Қиличбозлик. Паола ва бошқа спортчиларимиз яккаликда медаль қўлга кирита олишмади, бугун жамоавий баҳслар ташкил этилади

Аввалроқ, сабля йўналишидаги баҳсларда ўзбекистонлик қиличбозлар ҳам иштирок этишлари ҳақида хабар қилгандик. 

Ҳозирча мусобақа доирасида яккалик беллашувлари якунланди. Унга кўра, Зайнаб Дайибекова саралаш (пулька) баҳсларидаёқ имкониятни бой берган бўлса, Севинч Исмоилова, шунингдек легионер қиличбозларимиз Паола Плиего ҳамда Яна Обвинцева асосий даврадаги илк жангларидаёқ мағлубиятга учраб, яккалик баҳсларида иштирокларига якун ясашди. 

Маълумот ўрнида, пулька баҳсларида спортчилар гуруҳларга бўлинган ҳолда 5 та ёки 6 та жанг ўтказишади. Ушбу жангларда яхши натижа қайд эта олган спортчилар асосий даврага йўл олишади. Асосий давра эса олимпия тизимида ташкил этилади.

Бугун мусобақа доирасида жамоавий беллашувлар ташкил этилади. Ўзбекистон шарафини ҳимоя қилувчи қизларимиз илк босқичда Германия терма жамоаси билан тўқнаш келишади. Агар қиличбозларимиз ушбу жангни ўз фойдаларига ҳал қила олишса, кейинги босқичда уларга Ҳиндистон ёки Венгрия терма жамоаларидан бири рақиблик қилади.