Тошкент шаҳрида муай-тай спорти янада ривожлантирилади

Кеча Ўзбекистон муай-тай федерациясининг Тошкент шаҳар минтақавий бўлимининг навбатдаги ҳисобот-сайлов конференцияси ўтказилди. Йиғилишни минтақавий бўлим раиси, ўзбек муай-тай мактабининг етук вакилларидан бири Аҳмаджон Мирзаев олиб борди. Унда бир қатор масалалар муҳокама қилинди.

Конференция кун тартибидаги биринчи ва энг муҳим масала- бу Ўзбекистон муай-тай федерациясининг Тошкент шаҳар минтақавий бўлимига раис ўринбосари ҳамда Бош котибни сайлаш эди. Йиғилишда раис ўринбосарлигига номзод сифатида Жалолиддин Шамуратов тавсия этилди ва Конференция иштирокчилари томонидан маъқулланди. Бош котибликка эса Соҳибхон Ибрагимов номзоди бир овоздан қўллаб-қувватланди. Шунингдек йиғилишда Тошкент шаҳар терма жамоасига бош мураббий тайинланди. Бу масъулиятли вазифа кўплаб чемпионларни тарбиялаган маҳоратли мураббий Йўлдош Қосимовга ишониб топширилди.

Конференцияда шунингдек Тошкент шаҳар минтақавий бўлимининг йиллик мусобақалар тақвими тасдиқланди. Қолаверса, Республика миқёсидаги мусобақаларда пойтахт ёшларининг яхлит жамоа бўлиб иштирок этишини таъминлаш, Тошкент шаҳри спортчилари учун ягона спорт либослари (эпикировка) ишлаб чиқариш, мусобақаларни халқаро талаблар даражасида ташкил этиш, бир сўз билан айтганда Тошкент шаҳрини ҳар жиҳатдан намунавий бўлимга айлантириш лозимлиги таъкидланди.

Яна бир масала, бўлимда рўйхатдан ўтмаган ҳолда тренерлик қилаётган мутахассислар фаолиятини мувофиқлаштириш, Тошкент шаҳрида барча спортчи ва тренерларнинг ягона электрон маълумотлар базасини яратишга келишиб олинди.

Таъкидлаш жоиз, муай-тай спорти Осиё ўйинлари дастурига кирган. Шундай экан ушбу спорт турини ривожлантириш орқали Ўзбекистоннинг халқаро спорт нуфузини янада оширишга эришамиз.