Diana Adelshinova: "Kumirim – Olga Zabelinskaya"

Bugun etiboringizga terma jamoamizning etakchi sportchilaridan biri, qator xalqaro musobaqalar g'olibi va sovrindori Diana Adelshinova bilan suhbatni havola qilamiz:

 – Velosportga kirib kelishingiz qanday bo'lgan?
–  Velosportga 13 yoshimda Lyudmila Markelova murabbiyligida kirib kelganman. O'shanda poytaxtimizdagi Olimpiya mavzesida trek yo'nalishi bo'yicha shug'ullanar edim. Bu mashg'ulotlarimiz 1 yilga cho'zildi xolos va unda asosan jismoniy tayyorgarlik ustida ishladim. Keyin uzoq muddat velosportni tashlashimga to'g'ri keldi. 18 yoshimdan yana sportga qaytib keldim va Vadim SHayxov hamda Rustam Nuritdinov qo'l ostida shug'ullana boshladim. Bu insonlardan meni sportga qaytarishgani va birga mashg'ulot o'tkazishayotganidan mamnunman. Ular meni jamiyatimizga foydasiga tegadigan shaxs va sportchi qilib tarbiyalashgani uchun ham ulardan minnatdorman.

– Ushbu sportda qanday muvaffaqiyatlarga erishgansiz va o'z oldingizga qo'ygan rejalaringiz haqida aytib bersangiz.
–  Hozirda shosse va trek yo'nalishlarida bir necha karra O'zbekiston chempioni bo'ldim. 2019 yil BAAda shosse yo'nalishida o'tgan UAE challange turnirida g'alaba qozondim. SHuningdek, o'tgan yil Tailandda o'tgan Osiyo kubogida ham sovrindorlar qatoridan joy oldim. Bu sportda yanada marralarni zabt etishni istayman. Asosiy maqsadlarimdan biri mashhur xorijiy jamoalar tarkibidan joy oldim nufuzli musobaqalarda g'alaba qozonish. Ishonib qolamanki, koronavirus pandemiyasi hukumatimiz tomonidan ko'rilayotgan chora-tadbirlar bilan tez orada yurtimizda barham topadi. Barchasi ortda qolishi bilan bu yil uchun mo'ljallangan qator musobaqalar, jumladan, Osiyo chempionati va boshqa startga tayyorgarlikni boshlaymiz va yuqori natijalar qayd etishga harakat qilamiz.

– Velosportda kimga o'xshashga harakat qilasiz?
–  Kumirim Olga Zabelinskaya. Uning terma jamoamiz safida harakat qilayotgani biz kabi yosh sportchilarga qo'shimcha ishtiyoq beradi. Biz uning misolida kimning darajasiga qarab harakat qilishimizni ko'rib olamiz. U jamoamizning haqiqiy etakchisi. Unga ham sportchi, ham inson sifatida o'xshashni juda ham xohlayman. SHu o'rinda hozir barcha jamoadoshlarim, sportchilar va hamyurtlarimizga uyda qolib, koronavirus pandemiyasiga qarshi kurashda shifokorlarimiz talab qilayotgan ko'rsatmalarga rioya etishlarini so'rab qolaman. Biz birgalikda bu kasallikni, albatta, engib o'tamiz.