FEI Jumping Children`s Classic Final-2019. Boshlanishiga ikkita medal!

Nufuzli musobaqada dunyoning 12ta davlatidan yosh va iqtidorli chavandozlar g'oliblik uchun bahslarga kirishdi.

“FEI Jumping Children`s Classic Final-2019” musobaqasi ot sporti bo'yicha 15 yoshgacha bo'lgan chavandozlar o'rtasidagi eng nufuzli turnirlardan biri sanaladi va bunday yirik sport anjumani Osiyo qitasida hali o'tkazilmagan edi. Xalqaro ot sporti federaciyasi tomonidan ushbu nufuzli musobaqani O'zbekistonga ishonib topshirilishi – bu yurtimizda ot sportiga berilayotgan etiborning yuksak etirofidir.

Kechagi musobaqalarda besh qitadan kelgan 19 nafar chavandoz bahslarga kirishdi. Xalqaro bolalar kubogining ilk kunida ishtirokchilar belgilangan masofani tez va bexato bosib o'tish bo'yicha o'zaro raqobatlashdi. Unda rossiyalik Darya Kukushkina Kardinal laqabli oti bilan eng yaxshi natija qayd etib, 1-o'ringa sazovor bo'ldi.

Quvonarlisi, musobaqaning dastlabki kunida yurtimiz chavandozlari ham sovrinli o'rinlarni qo'lga kiritishdi. Terma jamoamiz azosi Zokir To'rajonov o'zining CHarlz Teron laqabli oti bilan ikkinchi yaxshi natijani qayd etdi. Yana bir vakilimiz Miryoqub Ismolilov esa Ledi laqabli tulpori bilan 3-o'rinni egalladi.