Final: Bugun "Humo" "Nomad"ga qarshi to'rtinchi o'yinda muzga chiqadi

Xokkey bo'yicha Toshkentning "Humo" jamoasi bugun Qozog'iston Ochiq chempionati final bosqichi doirasida "Nomad"ga qarshi ikkinchi safar o'yinida muzga chiqadi.

"Qanotlilar"ning bugungi uchrashuvi Toshkent vaqti bilan soat 16:00 da, Ostona shahridagi "Baris Arena"da boshlanadi.

Kecha jamoamiz uchinchi o'yin doirasida muzga chiqqan edi. 105 daqiqa davom etgan uchrashuvda "Nomad" jamoasi 1:2 hisobida g'alaba qozongan edi. Ushbu uchrashuv "Humo" uchun tarixdagi eng uzoq davom etgan o'yin bo'ldi.

Jamoalar o'rtasida o'tkazilgan uchta uchrashuvdan so'ng seriyadagi umumiy hisob 1:2, raqiblar foydasiga. Final doirasidagi o'yinlar seriyasi to'rttadan ettitagacha davom etishi mumkin.

"Humo"ning bugungi uchrashuvi YouTube platformasidagi InSportTV kanali orqali translyaciya qilinadi.