O'zbek sportida avj olayotgan "kasallik": Aeroportdagi "arzon piar" jonga tegmadimi?

So'nggi paytlarda Islom Karimov nomidagi Toshkent xalqaro aeroportida xalqaro musobaqalardan qaytayotgan sportchilarimizni tantanali ravishda kutib olish "epidemiyasi" avj oldi. Qizil gilam, gullar, model qizlar, harbiy orkestr, choponlar, bayroq ko'targan bolakaylar. Bir qaraganda ajoyib ko'rinadi. Ammo... tan olish lozim, oshirib yuborilmoqda. Kechasi soat 2 bo'ladimi, dam olish kuni bo'ladimi, sportchilar yurtimizga qanday musobaqadan kelishidan qati nazar, barcha aeroportga safarbar qilinadi. 

Yodingizda bo'lsa, yanvar oyida "shaxmatchi Abdusattorov voqeasi"dan so'ng shov-shuv ko'tarilgandi. SHundan so'ng qatiq ham puflab ichiladigan bo'ldi amaldorlarimiz tomonidan. To'g'ri, o'shanda Nodirbek tantanali kutib olishga arzirli ish qilgandi. Nodirbek va boshqa shaxmatchilarimizning o'shanda kutib olinmagani jamoatchilik bosimiga sabab bo'lgandi va ertasiga Milliy olimpiya qo'mitasida yuqori darajadagi amaldorlar, martabali mehmonlar ishtirokida tantanali tadbir tashkil etilib, shaxmatchilarimiz mukofotlangandi. Aslida aeroportda kutib olishning o'rniga, mana shunday tadbir orqali "piar" qilish maqulroq emasmi? Kunduzi. Ko'pchilik ishtirokida. Normal odam uxlamaydigan vaqtda. 

Tan olib aytish kerak, bugungi kunda aeroportda tantanali kutib olish uchun resurslarni ortiqcha sarflab yuboryapmiz. Gullar, modellar, choponlar va boshqa dabdabalarning turgan-bitgani harajatku. SHumi sportdagi pullarning maqsadli sarflanishi?  

Qiziq bo'lsa superog'ir vazn toifasidagi ukrainalik bokschi, uch yo'nalishda jahon chempioni Aleksandr Usik, shuningdek, yaqinda jahon boksi yulduzi Saul Alvaresni shov-shuvli tarzda mag'lub etgan Dmitriy Bivolning kutib olinishi aks etgan videolarni internetdan qidirib, ko'rib chiqing. Ortiqcha dabdaba yo'q. Ularning yutuqlarini ahamiyatini, salmog'ini sportni biroz tushunadigan odamlar ham yaxshi bilishadi. 

Yana qo'shimcha sifatida shuni aytish mumkinki, bu ommaviy axborot vositalari xodimlari uchun ham noqulayliklar tug'dirmoqda. Aeroportga kirishdagi sarsongarchiliklar haqida gapirmasak ham bo'ladi. Va yana, kechasi soat 02:00 da aeroportga chiqishdan sportimiz tepasidagilar ham xursand bo'ladilar deb o'ylamaymiz. 

Kutib olish uchun arziydigan musobaqalar - Olimpiya o'yinlari va kattalar o'rtasidagi jahon chempionatlari. Tamom! Ushbu jarayonda ishtirok etishdan barcha birdek xursand bo'lsa kerak. Lekin, past darajadagi xalqaro musobaqalar, "Qorbobo kubogi" kabi turnirlardan qaytayotgan sportchilarimizni tantanali kutib olishga hojat yo'q deb hisoblaymiz. Istovchilar kutib olsin, lekin "zamministr"dan tortib, jurnalistgacha suniy ravishda "aeroportga haydash" maqul ish emas.

Taklifimiz - bunday kutib olishlarni bekor qilish lozim va "piar"ni juda ham istashsa ertasi kuni o'sha sportchilar ishtirokida kichik tadbir, masalan matbuot anjumani, taqdirlash marosimlari (agar ko'zda tutilgan bo'lsa) tashkil etilsin. Yoki tinchgina uzoq yo'ldan charchab, uyini sog'ingan sportchilarga javob berib yuborish lozim.

Yurtdoshlarimiz yutuqlarini biz - OAV vakillari doimo xursandchilik bilan yoritib boramiz. G'alabalardan qanchalik quvonsak, mag'lubiyatlari dilimizni hira qiladi. SHunday yaxshi ko'ramiz sportchilarimizni. Yutuqlarni imkon qadar chiroyli, tezkorlik bilan xalqimizga etkazib berishga urinamiz. 

O'zbek sportiga oid har qanday yutuqdan, ijobiy yangiliklardan doimo xursand bo'lamiz. Lekin... haqiqatdan ham aeroportdagi "arzon piar" jonga tegmadimi?