14 iyu 20:33
Yangiliklar

Boshqalar

Xalqaro kriket Kengashi (ICC) vakillarining yurtimizga tashrifi samarali bo'ldi FOTOGALEREYA

Ommaviyligi jihatdan futboldan keyin ikkinchi o'rinda turuvchi va bugungi kunga kelib jahonning 4 milliarddan ortiq aholisining sevimli sport turiga aylangan kriket xalqimiz o'rtasida ommalashmoqda.

O'zbekiston kriket federaciyasi 2019 yilda tashkil etilgan. Faoliyatiga hali uncha ko'p bo'lmagan kriket federaciyasi tomonidan hozirgacha 6 ta 13 yoshgacha, 4 ta 19 yoshgacha, 4 ta kattalardan iborat hamda 1 ta xotin-qizlar jamoalari faoliyat yurityapti.

Bundan tashqari, O'zbekistonda istiqomat qilib, turli sohalarda mehnat qilayotgan chet ellik mutaxassislardan iborat 2 ta jamoa ham shakllangan.

Respublikamizning Toshkent shahri, Qashqadaryo, Farg'ona, Samarqand, Toshkent, Surxondaryo, Buxoro, Xorazm singari viloyatlarida ham jamoalar bor. O'tgan davr davomida yig'ilgan jamoalar o'rtasida kriket bo'yicha musobaqalar rejaga ko'ra o'tkazilmoqda.

2020 yili O'KF raisi Aziz Mixliev BAAning Dubay shahrida Xalqaro Kriket Kengashi (ICC) va Osiyo Kriket kengashi (ACC) rahbariyati bilan uchrashuv o'tkazdi. Unda O'zbekiston kriket federaciyasining xalqaro va Osiyo kriket kengashi azoligiga qabul qilinishi masalasi muhokama qilingandi. O'sha uchrashuvda ular mamlakatimizda kriket sport turining tezroq rivojlanish bosqichiga o'tishiga xayrixoh ekanliklarini bildirishgan edi.

O'zaro kelishuvga muvofiq, xalqaro kriket kengashi (ICC)ning Osiyo mamlakatlarida kriketni rivojlantirish bo'limi boshlig'i, oliy toifali xalqaro ekspert, janob Iqbol Sikander va ICCning moliyalashtirish ishlari menejeri Nitesha Kotariylar 11-13 iyul kunlari Toshkentda bo'lishib, O'KF faoliyati bilan yaqindan tanishishdi.

Xususan, ekspertlar O'zbekiston krekit federaciyasi raisi Aziz Mixliev hamrohligida Sportni rivojlantirish vazirligiga tashrif buyurishdi. Ularni vazir o'rinbosari Abdulla Aslonov qabul qildi.

Uchrashuvda tomonlar kriket sport turini mamlakatimizda rivojlantirish va hamkorlik aloqalarini yo'lga qo'yish masalalarini muhokama qilishdi. O'z navbatida Sportni rivojlantirish vazirligi kriket sport turini ommalashtirish borasida hamkorlik qilishga tayyorligini malum qildi.

SHundan so'ng mehmonlar CHirchiq shahrida joylashgan O'zbekiston davlat jismoniy tarbiya va sport universitetida, Qibray tumanida qurilayotgan krekit maydonida hamda Yunusobod tumanidagi 258 -sonli umumiy o'rta talim maktabi hududida "Anfa" krekit klubining yangidan barpo etilgan, xalqaro standartlarga mos tarzdagi mashg'ulot maydonida bo'lishdi.

Tashrif doirasida shuningdek, mehmonlar va O'zbekiston kriket federaciyasi raisi Aziz Mixliev poytaxtimizdagi milliy matbuot markazida OAV xodimlari ishtirokidagi matbuot anjumanida jurnalistlarning qiziqtirgan savollariga javob berishdi.

O'KF faoliyati bilan yaqindan tanishgan vakillar endi xulosalarini xalqaro kriket kengashi (ICC) rahbariyatiga taqdim etishadi.

Ishonch bilan aytishimiz mumkinki, tez orada O'zbekiston kriket federaciyasi ham ICCning to'laqonli azosi bo'lib, ro'yxatdan o'tadi.

Darhaqiqat, kriket bugun yoshlar qalbidan asta-sekin joy olmoqda. Umid qilamizki, mazkur sport turi yanada ommalashib, kriket bo'yicha jamoalarimiz ham xalqaro sport maydonlariga dadil chiqib borishadi.