Yurtimizda short-trek va kyorling turlarini ham rivojlantiramiz

MOQ va Associaciya rahbariyati mazkur tadbirlar yakuni va kelgusi rejalar xususida suhbatlashdi. Unda MOQ raisi Rustam SHoabdurahmonov va uning birinchi o'rinbosari Ravshan Irmatov, Qo'mita Bosh kotibi Oybek Kasimov, Iskander SHadiev boshchiligidagi O'zbekiston qishki sport associaciyasi mutasaddilari ishtirok etishdi.

Dastavval Iskander SHadiev o'tkazilgan tadbirlar taassuroti haqida gapirib o'tdi.

“Ushbu musobaqa yakunida jamoamiz bilan ko'plab xulosalar chiqardik. Ular orasida figurali uchish sportiga ixtisoslashgan maktab ochish, terma jamoaga xorijlik murabbiyni jalb qilish asosiy planga chiqmoqda. Taniqli murabbiy Eteri Tutrebidze ushbu sportni yurtimizda rivojlantirish bo'yicha hamkorlikka tayyor ekanligini bildirdi. Musobaqa haqida esa ota-onalar va yosh sportchilarimiz o'zlarining iliq fikrlarini bildirib o'tishdi”, – dedi O'zbekiston qishki sport turlari associaciyasi raisi.

SHuningdek, MOQ raisi kelgusi rejalar borasida o'z fikrlari bilan o'rtoqlashdi.

“Avvalo, selekciya ishlariga alohida ahamiyat qaratish zarur. Xorijlik mutaxassislarning mazkur jarayonni o'zlari amalga oshirishini men ham maqullayman. Hukumatimiz qishki sport turlarini rivojlantirishga ham katta etibor qaratmoqda. Biz bu borada o'z rejalarimizni qadam ba qadam hisob-kitob qilib olishimiz lozim. Bu yo'lda Milliy Olimpiya qo'mitasi barcha yordamni ko'rsatishga tayyor”, – dedi Rustam SHoabdurahmonov.

Tadbir davomida yurtimizda mavjud obektlardan unumli foydalangan holda short-trek, kyorling kabi qishki sport turlarini ham rivojlantirish, buning uchun mavjud bazalarni ko'zdan kechirish, bu borada yosh sportchilarga barcha sharoitlarni yaratib berish kabi masalalar atroflicha muhokama qilindi.