Zaynab Dayibekova: "O'zimga bildirilgan ishonchni oqlashga harakat qilaman"

Davlat rahbari ushbu tashrifi vaqtida Respublika sportchilarini taqdirladi. Jumladan, qilichbozlik bilan shug'ullanib kelayotgan Zaynab Dayibekova "Neksiya" mashinasi bilan taqdirlandi.

Ushbu quvonchli voqeadan so'ng Zaynab xursandchiligini yashira olmayapti.

Kuni kecha muhtaram Prezidentimiz Qoraqalpog'iston Respublikasiga tashrif buyurdilar. Ushbu tashrif chog'ida ular menga "Neksiya" avtomashinasini sovg'a qildilar. Ushbu kichik xizmatlarimizni inobatga olib, mana shunday taqdirlaganliklaridan judayam xursandman. Qolaversa, yaqinda Qoraqalpog'istonda qilichbozlik majmuasi qurildi. Bularning barchasi uchun yurtboshimizga minnatdorchilik bildiraman. O'zimga bildirilayotgan ishonchni oqlab, Osiyo o'yinlari, jahon chempionatlari va Olimpiada o'yinlarida sovrindor bo'lishga harakat qilaman.

Bu yilgi musobaqalar? Sentyabr oyida bo'lib o'tgan Osiyo chempionatida fahrli uchinchi o'rinni egalladim. Bundan judayam xursandman. Undan tashqari bu yil Bolgariyadagi jahon chempionatida, Tailandda bo'lib o'tgan Osiyo chempionatida ishtirok etdim.

Kirib kelayotgan 2018 yil bilan hammani tabriklayman. Barchangizga uzoq umr, sihat-salomatlik, o'z oldigan qo'ygan maqsadlariga erishishlarini tilayman. Yangi yil O'zbekiston uchun xar jabhada omadli kelsin", - dedi Zaynab.

Aziz To'xtamurodov yozib oldi