Рожер Федерер сентябрда Тошкентга келмайди

Маълумки, шу йилнинг 16-18 сентябрь кунлари Тошкентда теннис бўйича норасмий жаҳон чемпионати хисобланган Дэвис Кубогининг Жаҳон лигасига чиқиш учун учрашув бўлиб ўтади. Унда Ўзбекистон ва Швейцария терма жамоалари ўзаро тўқнаш келишади. Ғолиб жамоа жаҳон лигаси йўлланмасини қўлга киритади.

Ушбу учрашувда дунёнинг учинчи ракеткаси Рожер Федерер аниқ иштирок этмайди. Кеча Федерер баёнот бериб, жорий йил ҳисобидан бошқа кортга чиқмаслигини маълум қилди. Рожер тўрт йилликнинг энг нуфузли мусобақаси Рио Олимпиадасида ҳам қатнашмайди.

Катта эҳтимол билан дунёнинг бешинчи ракеткаси Стэн Вавринка ҳам Швейцария терма жамоаси таркибида Тошкентга келмайди. Шунда Швейцария терма жамоаси таркибида Марко Кьюдинелли (125), Генри Лаксонсен (162), Янн Марти (375), Адриен Боссел (476), Антони Бельер (534) каби теннисчилар қолади. Айнан мана шу теннисчиларнинг Тошкентдаги учрашувда Швейцария шарафини ҳимоя қилиши кутилмоқда.

Эслатиб ўтамиз, Ўзбекистон терма жамоаси бундан аввалги босқич саралаш учрашувида Хитой теннисчиларини Тошкентда 3:2 ҳисобида мағлубиятга учратиб, плей-оффда иштирок этиш ҳуқуқини қўлга киритганди.

Швейцарияликлар эса жаҳон лигаси биринчи босқичида Италияга қарши ўйин ўтказиб, 0:5 ҳисобида мағлубиятни қабул қилиб олгандилар.