17 июн 15:52
Янгиликлар
![](/upload/storage/263_220.jpg)
Рио-2016. Олимпиадада Ўзбекистонга медаль тақдим этиши мумкин бўлган спортчилар - Рустам Тўлаганов
Бугунги
қаҳрамонимиз бокс бўйича мамлакатимиз терма жамоаси аъзоси, халқаро
тоифадаги спорт устаси, Осиё чемпионати совриндори Рустам Тўлаганов.
Рустам
Тўлаганов – 1991 йилнинг 8 октябрь куни Тошкент шаҳрида дунёга келган.
Чин маънода истиқлол фарзанди. Спорт билан 10 ёшидан шуғулланишни
бошлаган. Тошкентдаги болалар ва ўсмирлар спорт мактабида илк мураббийи
Абдували Шомирзаевдан бокс сир-асрорларини ўрганди. Ўзининг ҳаракатчан
ва тиришқоқлиги билан терма жамоа мураббийлари эътиборини тортди. 2011
йили Бишкек шаҳрида ўтказилган халқаро турнирда у олтин медални қўлга
киритди. Бу унинг халқаро майдондаги илк медали эди. Айнан ўша йили
Покистонда ташкил этилган нуфузли халқаро мусобақада кумуш медалга
сазовор бўлди. 2012 йилда Венгрияда бўлиб ўтган халқаро турнирдан ҳам
кумуш медал билан қайтди. Шу йили Украина ва Хитой давлатларида
ўтказилган халқаро мусобақаларда ҳам шохсупага кўтарилди.
Саҳифамиз
қаҳрамони 2013 йили Россиянинг Қозон шаҳри мезбонлик қилган Бутунжаҳон
талабалар универсиадасида иштирок этди. Рустам финалга қадар
мағлубиятсиз етиб бориб, кумуш медал билан тақдирланди. Афсуски, қўлидан
олган жароҳати сабаб, у финал жангида иштирок эта олмади. Тўлаганов
финалга қадар озарбайжонлик Абдулқодир Абдуллаев, эстониялик Раин
Карлсон, франциялик Дилан Брежонларни катта устунлик билан мағлубиятга
учратган эди. Айнан ярим финалда Брежонга қарши ўтказилган жангдаги
жароҳат уни олтин медал учун кечадиган баҳсда рингга чиқишдан маҳрум
қилди. 2015 йили Рустам Тўлаганов Қатар пойтахти Доҳа шаҳрида ўтказилган
катталар ўртасидаги Жаҳон чемпионатида ҳам нисбатан муваффақиятли
иштирок этди.
Осиё чемпионати совриндори бўлган Рустам Тўлаганов Рио-2016 Олимпиадаси йўлланмасини шу йили Хитойнинг Куинан шаҳрида ўтказилган Осиё-Океания минтақаларининг қўшма лицензион мусобақасида қўлга киритди. 91 килограмм вазн тоифасида рингга кўтарилган ҳамюртимиз ярим финал жангида австралиялик Жейсон Вателейни нокаутга учратди. Бу ғалаба унга Олимпия ўйинлари чиптасини тақдим этди. Маълумот учун, чарм қўлқоп устамиз финал жангида хитойлик Ю Фенкайни мағлубиятга учратиб, Ўзбекистон терма жамоасига бешинчи олтин медални келтирганди.
Орзуим – 31-Ёзги олимпия ўйинлари медалларидан бирини қўлга киритишдир, - дейди боксчимиз. Биз олимпиадада иштирок этувчи барча спортчиларимиз қатори Тошкент бокс мактаби тарбияланувчиси Рустам Тўгановга ҳам чин маънода зафар ёр бўлишини, Бразилиядан ёруғ юз билан қайтиб келишини тилаймиз.
Муаллиф: К. Алимов
Фикрлар