ЖЧ-2016нинг учинчи куни 3 боксчимизда ғалаба, бирида мағлубият

17-18 ёшли боксчилар ўртасида ташкил этилаётган жаҳон чемпионатида дунёнинг 75 давлатидан 402 нафар чарм қўлқоп устаси 10та вазн тоифасида иштирок этмоқда.

Кеча жаҳон чемпионатининг учинчи куни рингга кўтарилган 4 боксчимиздан 3 нафари ғалаба қозонди. Тўртинчиси эса мағлубият аламини тотиб кўриб, мухлислар қаторидан жой олди.

52 кг вазнда қатнашаётган Отабек Холматов иккинчи жангида ҳам ғалабага эришди. Илк жангида қирғизистонлик Фатхиддин Ҳамроевдан 4:1 ҳисобида устун келган Отабек бу сафар венгриялик Иштван Жакани 5:0 ҳисобида енгди.

56 кг вазндаги вакилимиз Шунқор Абдурасулов италиялик рақиби Маттео Пиррерадан 5:0 ҳисобида устун келди.

91 кг вазн тоифасида рингга чиққан Шоҳруз Раҳимов хитойлик Ремула Абудурекситига ҳеч қандай имконият қолдирмади ва 5:0 ҳисобида зафар қучди.

Афсуски, энг енгил 49 кг вазн тоифасида юртимиз спорт шарафини ҳимоя қилаётган Абдувоҳил Маъруфхонов мағлубиятга учради. У хитойлик Зексин Ченга 0:5 ҳисобида имкониятни бой берди.