ЖЧ-2016нинг бешинчи куни 3 нафар боксчимизда ғалаба, бирида мағлубият

17-18 ёшли боксчилар ўртасида ташкил этилаётган жаҳон чемпионатида дунёнинг 75 давлатидан 402 нафар чарм қўлқоп устаси 10та вазн тоифасида иштирок этмоқда.

Кеча жаҳон чемпионатининг бешинчи куни рингга кўтарилган 4 боксчимизнинг 3 нафари ғалабага эришди, яна бири эса мағлубият аламини тотиб кўрди.

52 кг вазн тоифасида рингга кўтарилган ҳамюртимиз Отабек Холматов Никарагуа вакили Калеро Мартинезни 5:0 ҳисобида доғда қолдирди.

64 кг вазн тоифасида иштирок этаётган боксчимиз Беҳруз Раҳмонов ғолибона юришини давом эттирди. Илк жангида озарбайжонлик Бахтиёр Газибаевни 5:0 ҳисобида мағлуб этган Беҳруз бу сафар молдовалик Егор Беженарудан худди шу (5:0) ҳисобда устун келди.

91 кг вазн тоифасида рингга чиққан Шоҳруз Раҳимов ҳам иккинчи ғалабасига эришди. Шоҳруз венгриялик Ричард Кочсисдан 5:0 ҳисобида устун келди. Ҳамюртимиз илк жангида хитойлик Ремула Абудурекситига ҳеч қандай имконият қолдирмаган ва 5:0 ҳисобида зафар қучганди.

Афсуски, 81 кг вазндаги боксчимиз Санжар Турсунов мағлубият аламини тотиб кўрди. Санжар қозоғистонлик Бекзад Нурдаулетовга 1:3 ҳисобида ютқазиб қўйди.