ЖЧ-2016. Олтинчи кун. 3 нафар боксчимизда ғалаба, иккисида мағлубият

17-18 ёшли боксчилар ўртасида ташкил этилаётган жаҳон чемпионатида Ўзбекистон терма жамоаси аъзолари ҳам ўз имкониятларини ҳакамлар синовидан ўтказишяпти.

Кеча жаҳон чемпионатининг олтинчи куни рингга кўтарилган 5 боксчимизнинг 3 нафари ғалабага эришди, қолган иккиси эса мағлубият аламини тотиб кўрди.

Жумладан, 75 кг вазн тоифасида ўз имкониятини синовдан ўтказаётган Шоҳрузбек Рустамов учинчи жангида ҳам ғалабага эришди. У Хитой Тайпейи вакили Чиа-Вей Канни 5:0 ҳисобида мағлуб этди. Рустамов бунгача озарбайжонлик Расим Чобанли ва беларуслик Ягор Скамарохни бир хил 5:0 ҳисобида таслим этган эди.

56 кг вазн тоифасидаги чарм қўлқоп устамиз Шунқор Абдурасулов ҳам чиройли ғалабага эришди. Шунқор германиялик Андреас Ягердан 5:0 ҳисобида устун келди.

60 кг вазнда қатнашаётган Билолбек Мирзараҳимов бу сафар арманистонлик боксчи Нарек Ховханисянни 4:1 ҳисобида енгди. Билолбек бундан аввалги жангида қозоғистонлик кучли рақиби Санатали Толтаевни 5:0 ҳисобида мағлуб этган эди.

Афсуски, кечаги кунги баҳсларда иккита мағлубият ҳам бўлди. 64 кг вазн тоифасида иштирок этган боксчимиз Беҳруз Раҳмонов учинчи жангида Доминикан Республикаси вакили Эмилиано Полансога 1:4 ҳисобида ютқазиб қўйди. 69 кг вазндаги боксчимиз Улуғбек Собиров эса қозоғистонлик рақиби Садриддин Аҳмедовга 0:5 ҳисобида имкониятни бой берди.