ЖЧ-2016. Тўрт нафар боксчимиз ярим финалда, 4та медал нақд

Кеча жаҳон чемпионатининг еттинчи кунида чорак финал жанглари ўтказилиб, ярим финалга йўлланма олган боксчилар номи маълум бўлди. Улар орасида 4 нафар чарм қўлқоп устамиз ҳам ярим финалга йўл олди.

52 кг вазн тоифасида рингга кўтарилаётган ҳамюртимиз Отабек Холматов чорак финал жангида Доминикан вакили Луис Рейналдо Нуньесга қарши рингга кўтарилди. Ўсмирлар ўртасида Осиё вице-чемпиони бўлган ҳамюртимиз рақибини 4:1 ҳисобида мағлуб этди.

56 кг вазндаги чарм қўлқоп устамиз Шунқор Абдурасулов ҳам ярим финал иштирокчисига айланди. У қизиқарли кечган жангда хитойлик Цзэн Цзянь Минни 3:2 ҳисобида енгди.

60 кг вазнда қатнашаётган Билолбек Мирзараҳимов чорак финал жангида россиялик кучли рақиби Беслан Хамзаевга ҳеч қандай имконият қолдирмади ва 5:0 ҳисобида зафар қучди.

91 кг вазн тоифасида рингга чиққан ҳамюртимиз Шоҳруз Раҳимов чорак финал жангида англиялик Льюис Вильямсни 4:1 ҳисобида мағлуб этди. 

Афсуски, 75 кг вазн тоифасида ўз имкониятини синовдан ўтказган Шоҳрузбек Рустамов чорак финал жангида мағлубиятга учради. У германиялик Везир Агирманга 1:4 ҳисобида ютқазиб қўйди.