Полвонларимиз ноолимпия вазн тоифаларидаги жаҳон чемпионатида қатнашади

Бу ҳақда Ўзбекистон спорт курашлари ассоциацияси матбуот хизмати хабар бермоқда. Бирлашган спорт курашлари ассоциацияси (UWW) Рио-2016 Олимпиадасининг ҳар бир йўналишида мавжуд 8та вазн тоифасидан 2тасини киритмаган эди.

Айнан мана шу вазнларда жаҳон чемпионати ташкил этилади. Йилнинг сўнгги нуфузли мусобақасида эркин ва юнон-рум кураши бўйича Ўзбекистон терма жамоаси полвонлари ҳам ўз имкониятларини синовдан ўтказишади.

Эркин курашнинг 61 кг вазн тоифасида 2016-йилги ёшлар ўртасидаги Осиё чемпиони Темуржон Усмонохунов, 70 кг вазнда эса 2013-йилги жаҳон чемпионати совриндори, икки карра Осиё чемпиони, Осиё ўйинлари ғолиби Рашид Қурбонов юртимиз шарафини ҳимоя қилади.

Юнон-рум кураши баҳсларида эса бу йилги Ўзбекистон Кубоги ғолиби Фазлиддин Намозов (71 кг) ҳамда 2015-йилги Осиё чемпионати совриндори Жонибек Отабеков гиламга чиқади.