AIBA очколарни ҳисоблашнинг янги қоидаларини тасдиқлади

2017 йилдан эътиборан AIBA ташкилоти томонидан ўтказиладиган барча турдаги мусобақаларда янги очколарни ҳисоблаш тизимидан фойдаланилади.

Ушбу янгилик икки ҳафта аввал Россиянинг Санкт-Петербург шаҳри мезбонлик қилган ёшлар ўртасидаги жаҳон чемпионатида муваффақиятли тарзда синовдан ўтказилган эди.  

Янги тизимга кўра, рингнинг тўртта бурчагида очколарни ҳисоблаб борадиган ҳакамлар ишлайди. Ҳакамлар комиссиясининг раиси электрон кўрсаткичда қайд этилган очколарни назорат қилади. Жангнинг якуний натижаси баҳс якунига етганидан кейингина ошкор этилади. 

Энди ҳисоблар аввалгидек 3:0, 2:1 кўринишида бўлмайди. Аксинча, 5:0, 4:1, 3:2 кўринишида якуний натижаларда акс этади. Муддатидан аввал тўхтатиладиган жанглар бундан мустасно.  

Эслатиб ўтамиз, Рио-2016 Олимпиадасининг бокс мусобақасида ҳакамларнинг қарорлари кўплаб норозиликларга сабаб бўлганди. Мусобақа жараёнининг ўзида бир неча нафар ҳакам ўз ишидан озод этилган эди. Октябрь ойида эса AIBA Олимпиадада ишлаган 36 нафар ҳакамни четлатганди.