Албина турнирнинг 2-ракеткасини мағлуб этиб, финалга чиқди

Соврин жамғармаси 15 000 АҚШ долларини ташкил қилувчи Shymkent Open мусобақасида курашни давом эттираётган ягона вакиламиз Албина Хабибулина бугун ярим финал учрашувида кортга чиқди.

Ҳозиргина якунига етган учрашувда саралаш баҳслари орқали асосий тўрга етиб келган ҳамюртимизнинг рақибаси россиялик Анастасия Гасанова бўлди. Икки соату 44 дақиқа давом этган баҳсда Албина 5:7, 6:2, 6:1 ҳисобида ғалаба қозонди.

Таққослаш учун, 18 май куни 18 ёшга тўладиган Гасанова дунё рейтингида 411-ўринни эгаллаб турибди. Албина эса 1055-поғонадан жой олган.

Хабибулина бош мукофот учун учрашувда қозоғистонлик Камила Керимбаевага қарши кортга чиқади. Турнирнинг биринчи ракеткаси бўлган мезбон теннисчи ярим финалда россиялик Дарья Кружковадан 6:2, 6:3 ҳисобида устун келди.