Биласизми? Истомин бунгача 2 маротаба "Улкан тож"нинг 4-босқичига чиққан!

Аввалги босқичда Новак Жоковични мағлубиятга учратган теннисчимиз, бугун испаниялик Пабло Бустани мағлуб этди ва 4-босқич йўлланмасини қўлга киритди.

Шуни эслатиб ўтмоқчимизки, Денис Истомин бунгача ҳам "Улкан тож" туркумидаги турнирларнинг 4-босқичга йўлланма ола билган.

Биринчи маротаба, у 2012 йили "Уимблдон"да ушбу босқич ўйинида иштирок этган. Ўшанда у чорак финалга чиқиш учун россиялик Михаил Южнийга қарши баҳс олиб борган. Ўшанда теннисчимиз 2:3 (3:6, 7:5, 4:6, 7:6, 5:7) ҳисобида имкониятни бой бериб қўйганди.



Иккинчи маротаба эса у 2013 йилнинг ёзида "US Open"да ушбу босқичгача етиб бора олган. Ўшанда уни ҳозирги кундаги биринчи ракетка Энди Маррей тўхтатиб қолганди. Британиялик теннисчи Денисни ўша баҳсда 3:1 (6:7, 6:1, 6:4, 6:4) ҳисобида мағлуб эта олган.



Бу сафар Истоминнинг олдида Маррей ёки Южний тургани йўқ. Жоковични мусобақадан чиқариб юборган теннисчимиз чорак финалга йўл олиши учун Григоров ёки Гаскени мағлубиятга учратиши лозим бўлади! Бу эса уддаласа бўладиган иш. Олға, Денис!