Боксчиларимизнинг янги мавсумдаги илк йиғини давом этмоқда

Терма жамоамизнинг биринчи, иккинчи ва учинчи рақамли чарм қўлқоп усталари Тошкент вилоятидаги Янгиобод ўқув-машғулот базасида йиғинга киришишган. Бу жорий йил ҳисобидан илк йиғин ҳисобланади. 

Рио Олимпиадасида 7та медални қўлга киритган боксчиларимизни 2017 йилги спорт мавсумида ҳам нуфузли мусобақалар кутиб турибди.

Жумладан, жаҳон чемпионати Германияда, Осиё чемпионатида эса Индонезияда ўтказилади. Бундан ташқари, чарм қўлқоп усталаримиз кўплаб халқаро мусобақаларда ҳам юртимиз спорт шарафини ҳимоя қилишади.

Шунингдек, Бутунжаҳон бокс сериясининг навбатдаги мавсумида “Ўзбек йўлбарслари” (“Uzbek Tigers”) жамоаси ҳам иштирок этади. Ўтган йили жамоамиз дебют мавсуми бўлишига қарамай, ярим финалга қадар етиб борганди.