Буэнос-Айресдаги Олимпия ўйинларига йўлланмаларимиз сони яна биттага кўпайди

Мусобақа якунларига кўра, эркин кураш баҳсларида Эрон терма жамоаси учта Олимпия вазнида олтин медални қўлга киритганди. Регламентга кўра, мамлакат учун фақатгина иккита ўрин ажратилади. Шу сабабли, Эрон терма жамоаси йўлланмаларнинг биридан воз кечиши лозим эди. Куни кеча форслар -80кг вазн тоифасидаги йўлланмадан воз кечганликлари маълум бўлди. Ушбу вазн тоифасида ўзбекистонлик ёш полвон Муҳаммадрасул Раҳимов кумуш медални қўлга киритганди. Шу сабабли йўлланма автоматик равишда ҳамюртимизга бериладиган бўлди.

Шу тариқа, курашчиларимизнинг йўлланмалари сони яна биттага кўпайди. Буэнос-Айресдаги ўйинларда эркин кураш бўйича Осиёдан Эрон ва Ўзбекистон терма жамоаларига иккита, Япония терма жамоасидан эса бир нафар спортчи иштирок этади. Юнон-рум курашида эса Эрон ва Япония иккитадан, Ўзбекистон эса битта лицензияга эга. Аёллар курашида ҳам икки спортчимиз Олимпия ўйинларида қатнашиш ҳуқуқини қўлга киритган. Демак, мусобақада умумий ҳисобда спорт курашлари бўйича беш нафар спортчи Ўзбекистон шарафини ҳимоя қилади.

Қайд этиб ўтиш лозимки, спорт курашлари бўйича Марказий Осиё мамлакатлари ичида фақат Ўзбекистон Аргентинадаги III ёзги ўсмирлар Олимпия ўйинлари йўлланмасига эга бўлди. Қўшниларимиздан хеч қайси мамлакат Буэнос-Айрес йўлланмасини қўлга кирита олмади.