Бугун Истомин Астана турниридаги иштирокини бошлайди

Соврин жамғармаси 100 минг АҚШ долларини ташкил қилувчи ушбу “Челленжер” турнирида ҳамюртимиз иккинчи рақам остида таснифланган. Бугун Денис яккалик баҳсларининг илк давра учрашувида Хитой Тайпейи вакили Ти Ченга қарши кортга чиқади.

Россиялик Евгений Донской Астана “Челленжери”да биринчи рақам остида ҳаракат қилади. Ушбу турнирда яна бир ҳамюртимиз Санжар Файзиев ҳам ўз имкониятини синовдан ўтказади. Саралаш баҳслари орқали асосий тўрга етиб келган Санжар илк босқичда хитойлик Же Ли билан хисоб-китоб қилади.

Маълумот учун, мусобақа ғолиби 14,400 доллар мукофот пули ҳамда роппа-роса 100 рейтинг очкосига эга бўлади. Финалчи эса 8,480 доллар ҳамда 60 рейтинг очкосини ўз ҳисобига қўшиб қўяди.