Денис Истомин: “Бугунги мағлубиятда ўзим айбдорман”

Соврин жамғармаси 125 минг АҚШ долларини ташкил қилувчи турнирнинг яккалик баҳсларида Константин Кравчук бош мукофотни қўлга киритди. Россиялик теннисчи ҳал қилувчи финал учрашувида турнирнинг амалдаги ғолиби ҳамюртимиз Денис Истоминни 7:5, 6:4 ҳисобида таслим этди.

Тақдирлаш маросимида сўзга чиққан Денис Истомин ўз фикрини билдирар экан, финалдаги мағлубиятга ўзи сабабчи эканлигини айтди.  

“Аввало, бугунги ғалаба билан Костяни табриклайман. У Тошкентда жуда яхши ҳафтани ўтказди. Қолаверса, турнир ташкилотчилари, теннис федерацияси раҳбариятига ажойиб ташкилотчилик учун миннатдорчилик билдираман.

Жуда яхши мусобақа гувоҳига айландик. Лайнсмен ва болбойларга алоҳида раҳмат. Ҳафта давомида қўллаб-қувватлаган мухлисларга ҳам ўз ташаккуримни билдираман. Бугун ўз хатоим сабаб ютқаздим. Ҳеч қандай баҳона қилмайман”, ‑ дея сўзларига якун ясади Истомин.