Ҳамид Олимжоннинг эвараси Осиё чемпионатида қатнашади!

7-17 ёшли спортчилар ўртасидаги қитъа чемпионатида жами 15 нафар умидли ёшларимиз юртимиз шарафини ҳимоя қилишади. Уларнинг 12 нафари бундан бир оз муқаддам Тошкентда ўтган мактаб ўқувчилари ўртасидаги биринчи мамалакат чемпионатининг кумуш медал соҳибларидир.

Бу спортчилар Ўзбекистон Болалар спортини ривожлантириш жамғармаси маблағлари ҳисобидан қитъа чемпионатида қатнашадилар. Қолган уч шахматчи эса ўз ҳисобидан Осиё чемпионатида ғолиблик учун дона суришни мақсад қилган. Таркибдан ўрин олган ўсмирлар орасида Далер Воҳидов, Ҳумоюн Синдоров, Светлана Чайкина, Алихон Авазхонов каби анчагина тажрибали ёшлар бор.

Шунингдек, машҳур шоиримиз Ҳамид Олимжоннинг эвараси Сарварбек Олимжонов ҳам нуфузли мусобақада ўз маҳоратини намоиш этади. Эрондаги Осиё чемпионатида иштирокчилар классик, блиц ва рапид йўналишлари бўйича ўзаро бахс юритишади.

Кези келганда таъкидлаш лозимки, мамлакат чемпионатида ғолиб бўлганлар жорий йилнинг ноябрь-декабрь ойларида Россиянинг Сочи шаҳрида ташкил этиладиган мактаб ўқувчилари ўртасидаги жаҳон чемпионатида дона сурадилар.