Ҳасанбой Дўсматов: “Профессионал бокс, йўқ, мен Токио Олимпиадасида қатнашаман”

Профессионал бокснинг ўрта вазн тоифасида 3та йўналиш чемпиони бўлиб турган қозоғистонлик Геннадий Головкин ҳам ушбу Жанубий Африка Республикасининг промоутерлик компанияси билан ҳамкорлик қилади. Биз вазиятга ойдинлик киритиш мақсадида Ҳасанбой билан боғландик.

- Ҳасанбой, хориж матбуотида сизнинг “Golden Gloves” промоутерлик компанияси билан профессионал шартнома имзолаганингиз ҳақида хабарлар пайдо бўлди. Бу маълумот қанчалик ҳақиқатга яқин?

- Очиғи, бу ҳақида энди сиздан эшитдим. Мен на “Golden Gloves” ва на бошқа промоутерлик компаниялари билан шартнома имзолаганим йўқ. Бу нотўғри ва ҳеч қандай асосга эга бўлмаган маълумот. 

- Афсонавий Флойд Мейвезернинг Риода эканлигидан ва истеъдодли боксчилар билан шартнома имзолашга уринаётгани ҳақидаги аниқ маълумотлар бор. Балки, сизга ҳам таклиф билан чиқишгандир?

- Йўқ, ҳеч қандай таклиф бўлгани йўқ. Бўлган тақдирда ҳам, уларга берадиган жавобим тайин.

- Эндиги режалар қандай?

- Мен тўрт йилдан сўнг Токида бўлиб ўтадиган навбатдаги Олимпиадада ҳам иштирок этишни мақсад қилганман. Осиё қитъасида ўтказиладиган тўрт йилликнинг энг нуфузли мусобақасида Олимпиада олтин медалини ҳимоя қиламан. Ҳозир олдимда турган энг катта орзуим шу. Аслида, Олимпиада чемпиони бўлдим ва бу билан халқимизнинг, ота-онамнинг орзусини рўёбга чиқардим.

Суратлар муаллифи - Анвар Ильясов