“Ҳумо” бош мураббийи Хитой клубидан қабул қилинган аламли мағлубиятга изоҳ берди

Хоккейчиларимиз муҳташам “Ҳумо Арена”да Хитойнинг “КРС-БСУ” клубига 2:3 ҳисобида имкониятни бой бериб қўйишган эди. Учрашувдан сўнг ўтказилган матбуот анжуманида “Ҳумо” клуби бош мураббийи Евгений Попихин мағлубият сабабларини изоҳлади. 

- Олтин қоида ўз сўзини айтди: сен урмасанг, сенга уришади! Иккинчи бўлимда бизда дарвозани ишғол қилиш учун керагидан ортиқ вазиятлар бўлди. Учинчи бўлим ҳақида ҳам шундай фикр билдира оламан. Учга бир, иккига бир вазиятларда хоккейчиларимиз шайбани дарвозага жойлаб қўя олишмади. Бу каби 95 фоиз голли вазиятлардан фойдаламадингми, демак жазосини оласан. Жазоси эса - гол! Кейин четлатиш ҳам зараримизга ишлади. Тартиб-интизом ҳақида қайғурмасак, йигитлар билан бошқача гаплашмасак бўлмайдиганга ўхшаяпти. Хато қилиш билан четлатиш олиб, жамоани қийин вазиятда ташлаб кетиш ўртасида катта фарқ бор. Буни муҳокама қиламиз. 

- Евгений Николаевич, мағлубиятга қарамай, ижобий, позитив жиҳатлар ҳам бор. Тўрттала звено ҳам ўйнай бошлади. Бугун Всеволод Сорокин, Алексей Пепеляев ва Артём Воронин етишмади. Уларни қачон музда кўришимиз мумкин?

-  Уларни ҳар куни кутяпмиз. Алабтта, сиз номларини санаб ўтган хоккейчилар бизга етишмаяпти. Бошқа томондан ёшлар учун имконият юзага келяпти. Гап фақат уларнинг бу имкониятдан қай даражада фойдаланишида қолмоқда. Хоккейда бошқа жамоавий спорт турларидан фарқли равишда кўп имконият берилмайди. 

- Эртадан сўнг ўтказиладиган “Ценг Тоу”га қарши ўйинда Сорокин ва Воронинни кўрамизми?

- Очиғи, билмадим. Воронинни бугун кўрамиз деб кутгандик. Лекин бу амалга ошмади. Ҳар куни эрталаб етакчи хоккейчиларимизни ниҳоят таркибда кўрай дея умид билан уйғонаман. Бу хоккей, унда ҳамма нарсага тайёр туриш керак. 

- Хоккейчиларимиз бешга уч вазиятда ҳам бемалол, хотиржам, худди-ки исталган ҳужумимиз гол билан якунланади қабилида ҳаракат қилишди. Шу маънода шогирдларингизда рақибни менсимаслик ҳолати кузатилмадими? 

- Биз тайёргарлик кўрган эдик. Кеча йиғилишда рақиб ҳақида гапира туриб, таркибида тажрибали ижрочилар борлиги, дарвозабони кучли экани ҳақида такрор-такрор айтган эдик. Хитойликлар бундан аввалги “Химик”ка қарши кечган учрашувда жуда яхши ўйин намойиш этишганди. Хатто биринчи бўлимда “Химик”ни “кўмиб” қўйишлари ҳам мумкин эди. ВХЛда кучсиз жамоанинг ўзи йўқ. Ҳамма клублар охиригача курашиб, бугунгидек кутилмаган натижалар қайд этилишига сабаб бўлишяпти. 

- Бугунги учрашувда дарвозабоннинг ўрнига эртароқ ҳужумкор ўйинчини тушириш мумкин эдими?

- Бу тактика қарши ишлаб қолиши ҳам мумкин. Очиқ қолган дарвозани ишғол қилиш ҳамиша осон бўлган. Шунчаки, бир-икки киши устун бўлган вазиятлардан фойдаланиш керак эди.