Истомин Астанадаги турнирда чорак финалга йўл олди

Соврин жамғармаси 100 минг АҚШ долларини ташкил қилувчи ушбу “Челленжер” турнирида ҳамюртимиз иккинчи рақам остида таснифланган. Ҳозиргина якунига етган иккинчи давра учрашувида Денис япониялик 30 ёшли Юя Кибини 7:6, 2:6, 6:2 ҳисобида мағлуб этди.

Киби дунё рейтингида 361-ўринни эгаллаб турибди. Денис Истоминнинг чорак финалдаги рақиби Данил Медведев бўлади. Россиялик бу теннисчи дунё рейтингида 174-поғонадан жой олган.  

Маълумот учун, Денис илк давра учрашувида Хитой Тайпейи вакили Ти Ченни мағлубиятга учратганди. Ушбу турнирда иштирок этган яна бир ҳамюртимиз Санжар Файзиев илк босқичда хитойлик Же Лига имкониятни бой берганди.

Мусобақа ғолиби 14,400 доллар мукофот пули ҳамда роппа-роса 100 рейтинг очкосига эга бўлади. Финалчи эса 8,480 доллар ҳамда 60 рейтинг очкосини ўз ҳисобига қўшиб қўяди.