Жаҳон чемпионати. Афрузанинг илк мағлубияти, Синдоровда ҳам

8, 10 ҳамда 12 ёшли шахматчилар ўртасида ташкил этилаётган жаҳон чемпионатида дунёнинг 100га яқин мамлакатидан истеъдодли шахматчилар иштирок этяпти.

Улар орасида ҳамюртларимиз – ака-ука жаҳон чемпионлари Исломбек ва Жавоҳир Синдаров, Осиё чемпиони Ҳумоюн Бекмуродов, қизлардан Мафтуна Бобомуродова, Юлия Хегай ва Афруза Ҳамдамовалар юртимиз шарафини ҳимоя қилишяпти.

Саккиз ёшлилар ўртасидаги мусобақада имкониятини синаб кўраётган Ҳумоюн Бекмуродов 5-турда қора доналарда ҳаракат қилиб, грузиялик Жорж Кларксонга имкониятни бой бериб қўйди.

Ўн ёшли шахматчилар баҳсида биринчи рақам остида таснифланган Исломбек Синдоров қора доналарда америкалик Нико Часинга ютқазди. Ўн икки ёшли шахматчилар мусобақасида иккинчи тартиб рақамли иштирокчи бўлган Жавоҳир Синдоров эса бу турда эронлик Эйлиа Зомороддиан билан муросага келди.

Қизларимиздан Афруза Ҳамдамова кетма-кет тўртта ғалабадан сўнг илк мағлубиятни қарши олди. Афруза қора доналарда ўйнаб, БАА вакиласи Эсса Роудага ютқазди.

Юлия Хегай вьетнамлик Тан Буи Вега имкониятни бой берди. Мафтуна Бобомуродова эса ўзбекистонлик шахматчиларнинг 5-турдаги ягона ғалабасини қўлга киритди. У россиялик Галина Михеевани таслим этди.