Жумаев Нью-Делидаги турнирнинг пешқадамлари сафига қўшилди

15th Delhi International Open Grandmasters сhess tournament мусобақасида уч нафар гроссмейстеримиз – Марат Жумаев, Гулруҳбегим Тоҳиржонова ва Сарвиноз Қурбонбоевалар ҳам ўз имкониятларини синовдан ўтказишяпти. 

Кеча ўтказилган 8-тур учрашувларидан сўнг Марат Жумаев 8 имкониятдан 6,5 очко жамғариб, пешқадамлар сафига қўшилди. Гроссмейстеримиз қўшимча коэфицентларга кўра 16-поғонадан 8-ўринга кўтарилиб олди. Иккинчи поғонадаги шахматчи ҳисобида ҳам 6,5 очко бор. 

Жумаев 8-партияда мусобақанинг тўртинчи рақамли иштирокчиси, италиялик гроссмейстер Давид Албертони мағлубиятга учратди. Бугун у ўзи сингари 6,5 очко жамғариб турган ҳиндистонлик Ниранжан Навалгундга қарши қора доналарда ҳаракат қилади.

Сарвиноз Қурбонбоева оқ доналарда ўйнаб, россиялик халқаро гроссмейстер Андрей Девьяткинга ютқазди. У қўшимча кўрсаткичларга кўра 44-ўриндан жой олган.

Гулруҳбегим Тоҳиржонова эса оқ доналарда ҳаракат қилиб, мезбон шахматчи Мукержи Дебарши билан дуранг ўйнади. Гулруҳбегим 5 очко билан 52-поғонани банд этган.