Олимпиада-2018. Ўйинлар қандай иншоотларда ўтказилмоқда?

Ушбу нуфузли турнир қандай ишоотларда ўтказилади? Бугун шу ҳақида маълумотларни эътиборингизга тақдим этамиз.

Олимпиада-2018 иншоотлари

Пёнгчангдаги Олимпиада иншоотларининг бир-бирига яқин ва қулай жойлашуви Халқаро олимпия қўмитасининг мусобақани айнан ушбу шаҳарга ишониб топширилишида муҳим аҳамият касб этган. Ареналарга бориш учун спортчилар узоғи билан 30 дақиқа вақт сарфлайдилар.

Олимпиада иштирокчилари Альпенсия, Ёнгпёнг, Феникс-парк тоғ курортларига ва Каннин шаҳарчасига жойлаштирилади. Мусобақаларни ўтказиш марказлари сифатида Альпенсия (тоғ кластери) ва Каннин танланган.

Тоғ кластерида тоғ чанғиси, биатлон, бобслей, чана спорти ва скелетон мусобақалари ташкил қилинади. Олимпия стадиони ҳам шу ернинг ўзида жойлашган. Бу ерда 2018 йилги Олимпиаданинг очилиш ҳамда ёпилиш маросимлари ўтказилади.Каннин шаҳарчасида хоккей, конькида югуриш, шорт-трек, фигурали учиш ва кёрлинг мусобақалари бўйича беллашувлар бўлади. 

“Пёнгчанг Олимпия стадиони”

Олимпия ва Паралимпия ўйинларини ўтказиш учун қурилган арена. Альпенсия тоғ курорти шимолидан 2км узоқликда жойлашган.

2017 йилда қуриб, фойдаланишга топширилган. Ўтган йилнинг 30 сентябрь куни расман очилган. Мазкур иншоот қурилиши учун 78 миллион АҚШ доллари сарфланган. Стадион 35 минг мухлисга мўлжалланган бўлиб, бешбурчак шаклида қурилган.

"Альпесия" биатлон маркази

Ушбу биатлон маркази Альпенсия тоғ курорти чегарасида қад ростлаган. Пёнгчанг-2018 ўйинларида биатлон бўйича баҳсларга мезбонлик қилади.

1998 йилда қурилган. 2007 ва 2015 йилларда қайта реконструкция қилинган. 2007/2008 ва 2016/2017 йилларда ушбу аренада жахон кубоги босқичлари ўтказилган. 2009 йилда эса марказ биатлон бўича жаҳон чемпионатини қабул қилган.

"Каннин Овал"

Каннин шаҳридаги конькида югуриш спорт турига мўлжалланган ёпиқ стадион. Пёнгчанг-2018 ўйинлари давомида конькида югуриш бўйича ўтказиладиган мусобақаларни қабул қилади. Стадионда овал шаклидаги 400 метрли иккита югуриш йўлакчаси мавжуд.


8000 мухлисни ўз бағрига сиғдира олади. Иншоотнинг тахминий нархи 36,8миллион долларга бахоланган. Стадион қурилиши 2014 йилда бошланиб, 2017 йил январь ойида якунланган. 2017 йилнинг февраль ойида “Каннин Овал”да конькида югуриш бўйича жаҳон чемпионати ўтказилган.

"Альпенсия чанғи маркази”

Бу ерда Олимпия ўйинларининг чанғи пойгалари ва чанғидаги иккикураш мусобақаларини ўтказилади.


Объект 1998 йилда қуриб битказилган. 2009 йилда қайта реконструкция қилинган. Мажмуа 2017 йилги жаҳон кубоги мусобақаларини ўзида қабул қилган.

“Каннин муз саройи”

Мазкур иншоотда олимпиаданинг фигурали учиш ва шорт-трек мусобақалари ўтказилади. Расмий очилиш маросими 2016 йилнинг 14 декабрь куни ўтказилган.


Муз саройининг қад ростлаши учун ишлатилган сарф-ҳаражатлар 85миллион АҚШ долларини ташкил қилади. Бу ерда 12 минг мухлис баҳсларни бевосита кузатиши мумкин.

Олимпия ўйинларигача бу ерда 2017 йилги фигурали учиш бўйича Корея чемпионати, шунингдек, “Тўрт қитъа кубоги” баҳслари, шорт-трек бўйича 2017 йилги жаҳон кубоги босқичи ўтказилган.

"Альпенсия бобслей маркази”

Ушбу мажмуада бобслей, чана пойгалари ва скелетон мусобақалари ўтказилади. Марказнинг қурилиши 2013 йил декабрь ойида бошланган ва 2017 йил якунида битирилди. Трибуналарга 7000 мухлис жойлашиши мумкин. Мазкур иншоот қурилишига 122 миллион доллар ажратилган.

Трассанинг узунлиги 2018 метрни ташкил қилади. Старт чизиғи 940 метр, финиш эса 800 метр баландликда жойлашган.

"Альпенсия трамплиндан сакраш комплекси”

Ушбу иншоотда трамплиндан сакраш, сноуборд, шунингдек, чанғида сакраш бўйича иккикураш баҳслари бўлади. Мажмуанинг расмий очилиш маросими 2008 йилда бўлиб ўтган. 2015 йилнинг апрель ойида Олимпия ўйинлари талаблари асосида қайта реконструкция қилинди. 13500 мухлисга мўлжалланган.

Комлекс К-98 хамда К-125 трамплинларини ўз ичига олган. Олимпия ўйинлари якунлангач, бу иншоотдан миллий машғулот маркази сифатида фойдаланиш кўзда тутилган.

"Бокванг экстрим парки”

Марказ Бонгпен-мен тоғ-чанғи курортида жойлашган. Бу ерда кўплаб тоғ чанғиси трассалари ҳамда махсус қишки экстрим спорт турлари учун майдонлар бор.


Пёнгчанг-2018 ўйинларида фристайл ва сноуборд мусобақалари шу ерда бўлади. Олимпиада давомида бу ердаги баҳсларни бевосита 18000 мухлис кузата олиши мумкин.

“Каннин хоккей маркази”

Каннин шаҳрида жойлашган муз аренаси. Олимпия ўйинлари вақтида бу иншоот хоккей мусобақаларининг асосий мезбони бўлади. Шунингдек, ушбу аренада слеж-хоккей ўйинлари хам ўтказилади.

Арена қурилиши 2014 йилнинг март ойида бошланган. Расмий очилиш маросими эса 2017 йили март ойида бўлиб ўтган. Иншоот қурилиши ташкилотчилар учун 90 миллион АҚШ долларига тушган. Ўз бағрига 10000 мухлисни сиғдира олади.

“Квандон университети спорт аренаси”

Бу ер ҳам “Каннин хоккей маркази” каби Олимпия ўйинларининг хоккей баҳсларига мезбонлик қилади. Аренанинг қурилиш ишлари 2014-2017 йиллар давомида бўлган.


Сиғими 6000 мухлисга мўлжалланган.

“Каннин кёрлинг маркази”

Бу ер Олимпия ўйинлари вақтида ёпиқ иншоотга айлантирилади ва кёрлинг баҳсларига мезбонлик қилади. Ушбу марказ 1999 йилги Осиё ўйинларини ҳам қабул қилган. Ундан ташқари 2005 ва 2011 йилларда фигурали учиш бўйича бир қатор халқаро мусобақалар хам айнан мана шу иншоотда ўтказилган.


Қолаверса, 2007 йил шорт-трек, 2009 йилда эса кёрлинг бўйича жаҳон чемпионати ҳам айнан шу ерда бўлиб ўтган. Арена қурилиши 1998 йилда бошланиб, ўша йилнинг ўзидаёқ якунланган. 3500 мухлисга мўлжалланган.

“Ёнгпёнг чанғи маркази”

Жанубий Кореядаги энг машҳур тоғ курортларидан бири. Ушбу иншоот денгиз сатҳидан 700 ва 1458 метр оралиқ баландликда жойлашган. Мажмуада икки баландликдан тушиб келинади: “Gold Peak” (1127 м) ва “Dragon Peak” (1458 м).

Олимпиада давомида Ёнгпёнг трассаларида слалом ва гигант слалом мусобақалари ўтказилади. Мухлислар сиғими 12000 ни ташкил этади.

Ёнгпёнг чанғи маркази 1998, 2000 ва 2003 йилларда жахон кубоги баҳсларига мезбонлик қилган.

“Чонсон чанғи маркази”

Гариванг тоғида жойлашган. Расмий очилиш маросими 2016 йилнинг 22 январида бўлган. 2018 йилги Олимпия ўйинлари давомида ушбу марказ тоғ чанғисининг тезкор тушиш, “супер-G”ўйинларини қабул қилади.


Тезкор тушиш мусобақаларида аёллар  учун трасса 2499, эркаклар учун эса 2852 метрни ташкил қилади. “Супер-G”да эса аёллар учун 1982, эркакларга эса 2217 метр узунликдаги трассалар мўлжалланган. Мухлислар учун 6500та жой ажратилган.

Азиз ТЎХТАМУРОДОВ тайёрлади