Олтин Гран-При. Риода бронза медалини қўлга киритган Тасмурадов чорак финалда ютқазиб қўйди

Ушбу нуфузли турнирда эркин ва юнон-рум кураши бўйича Ўзбекистон терма жамоаси полвонлари ҳам ўз маҳоратларини намойиш этишяпти. Гран-Прида Олимпиада ғолиб ва совриндорларининг иштирок этаётгани турнирнинг муросасиз кечиниши таъминламоқда.

Афсуски, терма жамоамиз аъзолари учун мазкур мусобақа омадсиз ўтмоқда. Деярли барча курашчиларимиз саралаш баҳсларидаёқ мағлубият аламини тотиб кўришди.

Жумладан, Рио Олимпиадаси совриндори 66 кг вазндаги Элмурат Тасмурадов чорак финал баҳсида мезбонлар вакили Ровшан Тагиевга 0:6 ҳисобида ютқазиб қўйди.  

Мирзобек Раҳматов эса сербиялик Александр Максимовичга 0:8 ҳисобида имкониятни бой берди. Ҳамюртларимиздан биргина Феруз Тўхтаев ярим финалга чиқди. У бугун финал чиптаси учун россиялик Мингиян Семеновга қарши гиламга чиқади.