Рио-2016. Индонезиялик спортчиларга бериладиган пул мукофотлари маълум

Унга кўра, Олимпиадада олтин медални қўлга киритган спортчилар 333.000 евро ҳамда ҳар ойда 1300 евро миқдорида умрбод нафақа оладилар. Бу ҳақда Индонезия спорт вазирлиги вакили Гатот Дева Брото маълум қилган.

Кумуш медаль эгалари 133.000 евро, бронза медали совриндорлари эса 66.500 евро миқдорида пул мукофотларига эга бўладилар. Маълумотларга кўра, спортчиларга мукофот сифатида бериладиган пулларнинг миқдори “Лондон-2012” ўйинларига нисбатан беш баробарга кўтарилган.

Эслатиб ўтамиз, 2012 йилги Олимпиада ўйинларида Индонезия вакиллари олтин медални қўлга кирита олмагандилар.

Индонезия спортчилари илк бор Олимпиада ўйинларида 1952 йилда иштирок этишган ва ўтган давр мобайнида ушбу юрт вакиллари жами 6 та олтин, 10 та кумуш ва 11 та бронза медалига эгалик қилишган.

Ўзбекистон Миллий Олимпия қўмитаси матбуот хизмати