Тўрт нафар боксчи қизимиз “Chinggis Khan Cup” турнири ярим финалида!

Ўнга яқин давлат боксчилари иштирок этаётган турнирда мамлакатимизнинг иккинчи рақамли чарм қўлқоп усталари ҳам рингга кўтариляпти. Шунингдек, аёл боксчиларимиздан тўрт нафари ҳам ўз маҳоратларини намойиш этишяпти.

Қувонарлиси, уларнинг барчаси иккитадан жангларини ғалаба билан якунлаб, ярим финалга йўлланма олишди. Шаҳноза Низомова, Мафтунахон Мелиева, Турсуной Раҳимова, Дилнозахон Одилжоновалар камида бронза медалини нақд қилишди.

Эркаклар ўртасидаги баҳсларда эса Нодиржон Мирзааҳмедов, Аброр Қодиров, Элнур Абдураимов, Фазлиддин Мелибоев, Исроил Мадримов ва Зуҳриддин Маҳкамовлар ғалабали юришларини давом эттиришяпти. Биргина Бургут Хожибоев илк жангида мағлубиятга учраган.

Мўғулистондаги турнирда терма жамоамизга Рустам Саидов ва Дилмурод Хасановлар мураббийлик қилишяпти. Бекжон Юсупов эса бокс баҳсларида ҳакамлик қиляпти.