Тошкентда тўрт нафар жаҳон тождорлари хисоб-китоб қилишади

Буюк саркарда ва давлат арбоби Амир Темур таваллудининг 680-йиллигига бағишлаб ўтказилаётган ушбу супер турнирда дунё тан олган тўрт нафар гроссмейстер иштирок этади. Уларнинг барчаси ўз вақтида жаҳон тожини кийгани мусобақанинг муросасиз кечишини таъминлаши аниқ.

Озарбайжонлик Шахрияр Мамадияров 2013 йили блиц йўналишида жаҳон чемпиони бўлган. Исроиллик Борис Гельфанд 2009 йилда Жаҳон Кубоги соҳибига айланган. Украиналик Руслан Пономарев 2002-2003 йилларда жаҳон чемпионлигига эришган. Ҳамюртимиз Рустам Қосимжонов эса 17-жаҳон чемпиони хисобланади.

Бугун шахматчилар иштирокида матбуот анжумани ҳамда ёш шахматчилар учун маҳорат сабоқлари ташкил этилади. Эртага эса гроссмейстерлар қадим ва ҳамиша навқирон Самарқанд шаҳрига ташриф буюришади. У ерда ёш шахматчиларга маҳорат сабоқларини ташкил этиш ҳам режалаштирилган. Мусобақанинг ўзи эса 18 октябрь куни старт олади.