Тошкентдаги Осиё чемпионатида Олимпиада чемпионлари ҳам иштирок этадилар

30 апрель - 7 май кунлари Тошкент мезбонлик қиладиган бокс бўйича қитъа чемпионатида Рио Олимпиадаси қаҳрамони бўлган ўзбек боксчилари ҳам иштирок этишлари кутилмоқда.

Маълум бўлишича, турнирда Ҳасанбой Дўсматов, Шаҳобиддин Зоиров, Шаҳрам Ғиёсов, Бектемир Мелиқўзиев ва Муроджон Аҳмадалиев каби спортчиларимиз Ўзбекистон шарафини ҳимоя қиладилар. 

Мусобақада 10 та вазн тоифасида жанглар ташкил қилинади. Хитой, Ҳиндистон, Эрон, Иордания, Қозоғистон, Жанубий Корея, Моғулистон, Покистон, Шри-Ланка, Тожикистон ва Ўзбекистон терма жамоалари турнирда тўлиқ таркиб билан иштирок этадилар. 

Чемпионатда шунингдек Рио-2016 да медаллар қўлга киритган Василий Левит (Қозоғистон), Доржинамбу Отгондалай (Моғулистон) каби спортчилар ҳам қатнашадилар. 

2015 йилги Доҳада бўлиб ўтган жаҳон чемпионатида совриндор бўлган 12 нафар осиёлик боксчидан 7 нафари ушбу турнирда қатнашиши кутилмоқда. 

Тошкентда бўлиб ўтадиган Осиё чемпионати шу йили Гамбургда ўтказиладиган жаҳон чемпионатига саралаш вазифасини ҳам бажаради. Дунё биринчилигида Осиё номидан 60 нафар боксчи қатнашиши кутилмоқда. Бу дегани ҳар бир вазн тоифасидан 6 нафар осиёлик боксчи жаҳон чемпионатида қатнашади.

Эслатиб ўтамиз, Тошкент бокс бўйича қитъа чемпионатига учиинчи маротаба мезбонлик қилмоқда. Бунгача пойтахтимиз 1995, 1999 йилларда мазкур турнирни қабул қилганди.

Манба: Осиё бокс конфедерацияси расмий сайти. 

Инглиз тилидан Азиз Тўхтамуродов таржима қилди