Магомед ва Муҳаммадрасул Қозоғистондаги рейтинг турнири 1/2 финалида

Бугун мусобақанинг учинчи куни эркин кураш беллашувлари бошланди. Бизнинг эътиборимиз кучли таркиб билан Қозоғистонга жўнаб кетган Ўзбекистон терма жамоасига қаратилади. Уч нафар Олимпиада совриндоримиз мусобақа медаллари ҳамда қимматли рейтинг очколари учун баҳсларга киришадилар. 

Қувонарлиси, 97 кг вазн тоифасида юртимиз шарафини ҳимоя қилаётган икки курашчимиз мусобақанинг ярим финал йўлланмасини қўлга киритди. Рио Олимпиадаси совриндори Магомед Ибрагимов бироз аввал чорак финалда ҳиндистонлик Дипак Дипакни 11-6 ҳисобида енгди. Муҳаммадрасул Раҳимов эса қозоғистонлик Бекзат Уркимбайга ҳеч қандай имконият (11-0) қолдирмади. 

Бироздан сўнг ўтказиладиган 1/2 финалда Ибрагимов словакиялик Батирбек Цакуловга, Раҳимов эса эронлик Амирхоссейн Фирузпурбандпейга қарши гиламга чиқади.