28 апр 00:49
Янгиликлар
![](/upload/storage/260156_220.jpg)
Нодиржон Мирзаҳмедов "чопилганлар"нинг навбатдагиси(ми?)
Кеча ижтимоий тармоқларда - 48 кг вазн тоифасида жанг қилувчи ўзбекистонлик боксчи Нодиржон Мирзаҳмедовнинг жаҳон чемпионатида иштирок этувчи таркибдан нохақ чиқариб юборилгани айтилаётган видео тарқалди. Видеода боксчининг айнан нима сабабдан таркибдан чиқарилгани айтилмаган эди.
Нодиржон Мирзаҳмедов яқин кунларгача терма жамоа таркибида жаҳон чемпионати учун тайёргарлик олиб бораётган эди, у Куба терма жамоаси билан қўшма машғулотларда ҳам иштирок этган эди. Olamsport.com'га берган интервюсида эса Мирзаҳмедов ЖЧ таркибидаги ўрни аниқ бўлганини истисно этмаган эди.
Таркибдан "чопилганини" очиқ-ойдин айтган боксчимиз Olamsport.com'га берган қисқа интерювсида бунга қуйидагича муносабат билдирди:
"Йўқ, ҳеч қандай сабаб йўқ! Кўрдингиз, Ўзбекистон чемпионатини ҳам ютдим бу йил, яна ишонишмади ва спарринглар қилишди. Спаррингларда ҳам ютдим. Ўзим ҳам тушунмай қолдим нега "чопишганини"... Лекин ҳамма спарринг босқичларидан ўтган эдим. Уларнинг қарори эса шунақа бўлди охирида. Катталарга ёқмабмиз, шекилли!".
Ҳозирда Нодиржоннинг ўрнига - 48 кг вазн тоифасида ким рингга чиқиши маълум эмас, аммо катти эҳтимол билан энди бу вазнда Шодиёр Мелиқўзиев юртимиз шарафини ҳимоя қилади.
Мирзаҳмедов ўтган йили Ўзбекистон чемпионати финалида айнан Мелиқўзиевни мағлуб этиб, олтин медални қўлга киритган эди. Февраль ойида Болгарияда бўлиб ўтган "Странжа" мусобақасида эса Мирзаҳмедов чорак финалда мағлуб бўлиб, мусобақани тарк этган эди. Нодиржон билан бир вазнда иштирок этган Шодиёр Мелиқўзиев эса София шаҳридаги турнирда олтин медални қўлга киритган эди.
Жаҳон чемпионати учун айнан қайси жиҳат устунлик қилгани қизиқ: тажриба ёки ёшларга имконият берилиши
Мелиқўзиев ҳам ўз-ўзидан келиб қолмагани аниқ бу йўлгача, унинг "Странжа"даги натижаси катта рол ўйнаши табиий. Аммо шу кунгача - 48 кг вазнда Нодиржон Мирзаҳмедов ЖЧ учун асосий номзод бўлиб келаётган эди. Унинг мусобақага бир ҳафта қолганида таркибдан тушиб қолгани, бироз кутилмаган қарор бўлиб қолмоқда.
Бундан аввал Ўзбекистон терма жамоаси таркибида - 54 кг вазнда Миразиз Мирзахалилов, - 80 кг вазнда жанг қилувчи Одижлон Аслоновларнинг Тошкентдаги жаҳон чемпионатида рингга чиқмаслиги маълум бўлган эди. Бундай кутилмаган қарорларнинг ҳеч бирига ҳозиргача муносабат билдирилмади.
Узун-қулоқ гапларга қараганда, Миразиз Мирзахалилов 2021 йилги Жаҳон чемпионатидан сўнг допинг назоратида бўлмаган ва шу сабабли у бу сафарги мусобақадан чиқарилган. Аммо Одилжон Аслонов ва мана энди Нодиржон Мирзаҳмедовнинг таркибдан тушиб қолиши — тушунарсиз.
Балки термада рақобатни охиригача ушлаб турмоқчи бўлишгандир (!), балки ёшларга имкон бериш биринчи вазифа сифатида олингандир. Аммо ўз юртимизда ўтадиган илк жаҳон чемпионатида ўз вазнининг "эгалари" бирин-кетин таркибдан тушиб қолаётгани шубхаларни кўпайтирса кўпайтиряпти-ки, асло камайтирмаяпти.
Бугун ёки эртага терма жамоанинг якуний таркиби ҳам эълон қилинса керак, шунда барча саволларимизга жавоб олишимиз мумкин бўлади. Ҳар қандай ҳолатда ҳам мухлислик қилишда давом этамиз, шунчаки уни "сўндириб" қўйишмаса бўлгани!
Диёрбек Мавлонов
Фикрлар