Toshkent shahrida "Avtomobilsiz kun" nishonlandi + FOTOGALEREYA

SHu kuni avtotransport egalari avtomobil va motocikllardan foydalanmasdan, sog'lom turmush tarzini tanlab, reja qilgan manzillariga velosiped yoki piyoda borishga harakat qilishadi. Bu bilan ular ushbu kunda sog'lom turmush tarziga oshno tutinish barobarida hech bo'lmasa bir kunga havoni avtomobillardan chiqadigan zaharli gazlardan tozalashga o'z hissalarini qo'shishni maqsad qilishadi.

O'zbekistonda ham bugun ko'plab yurtdoshlarimiz o'zlarining shaxsiy avtotransportlaridan foydalanmasdan, piyoda va velosipedda harakatlanib, boshqa harakat ishtirokchilariga ham bir kun avtomobilsiz yurishni, sog'lom turmush tarzini tanlashni tavsiya qilishmoqda.

Mazkur jarayondan Turizm va sport vazirligi jamoasi ham chetda qolmadi. 22 sentyabr kuni vazirlik binosida turli korxona va tashkilotlarning xodimlari, qolaversa turizm va sport mavzularini keng yoritib kelayotgan ommaviy axborot vositalari xodimlari jam bo'lishdi. Ular O'zbekiston Respublikasi Bosh vaziri o'rinbosari – turizm va sport vaziri Aziz Abduxakimov boshchiligida #avtomobilsizbirkun chellenji doirasida vazirlik binosidan boshlab to Eko-parkkacha bo'lgan masofani velosipedda bosib o'tishdi. Ular poytaxtimizning markaziy ko'chalari bo'ylab qariyb 6 kilometr masofani bosib o'tgan holda yurtdoshlarimiz uchun o'ziga xos namuna vazifasini o'tab berishdi.

- Malumki, Vazirlar Mahkamasining tegishli qarori bilan 22 sentyabr O'zbekistonda “Avtomobilsiz kun”, deb belgilangan, - deydi Aziz Abduhakimov. - Biz bu sanani o'tgan yili ham keng nishonlashga harakat qilganmiz. Bu yil esa “Avtomobilsiz kun” doirasidagi tadbirlarni yanada keng qamrovda tashkil etdik. Xususan, bu yil barcha hududlarni, hattoki xorijdagi diplomatik korpuslarimizni ham ushbu sana munosabati bilan tashkil etilayotgan chellenjlarimizga jalb qildik. Bizni ommaviy axborot vositalari xodimlari ham har tomonlama qo'llab-quvvatlagan holda #avtomobilsizbirkun chellenjida faol ishtirok etishganligini alohida takidlab o'tishni istardim. Bu jarayonda ko'plab vazirlik va idoralar, korxona-tashkilotlarning rahbar xodimlari “shaxsiy namuna” tamoyili asosida o'z ish joylariga piyoda yoki velosipedda borib, yurtdoshlarimiz uchun namuna ko'rsatishganligi ham tahsinga loyiq. Ushbu tadbirimizning ahamiyatli jihatlariga etibor qaratadigan bo'lsak, avvalo bu ekologiyamizga juda ham ijobiy tasirini ko'rsatadi. SHu bilan birgalikda “Avtomobilsiz kun” aksiyasi aholining alternativ transport vositalaridan foydalanish ko'nikmasini shakllantirishga yordam beradi. Va eng muhim jihatlardan yana biri, aholi orasida sog'lom turmush tarzini ommalashtirishda muhim vositalardan biri bo'lib xizmat qiladi.

Velosayr yakunida chellenj ishtirokchilari Eko-park bo'ylab piyoda sayr qilishdi va bu orqali xalqimiz orasida piyoda yurish, uning inson salomatligini mustahkamlashda muhim ahamiyat kasb etishini ham keng targ'ib qilishdi.

Tadbirdan olingan suratlarni tomosha qiling. 

Muallif: Alimurod Mamadaminov