13 yillik tarix qayta yoziladimi? Makgregor – Xollouey revanshi dunyo nigohida (mutolaa uchun)

UFC 329 turnirining markaziy bahsida ikki davrning yulduzlari — Konor Makgregor va Maks Xollouey oktagonda ikkinchi marta to'qnash keladi. Bu oddiy revansh emas. Bu o'tmish bilan bugunning, mashhurlik bilan barqarorlikning, tajriba bilan jismoniy tayyorgarlikning o'zaro ikkinchi marta to'qnash kelishidir.

Birinchi jangdan bugungacha

Makgregor va Xollouey ilk marta 2013 yilda jang qilgan. O'sha vaqtda har ikkisi endigina UFC'da o'z o'rnini topishga harakat qilayotgan sportchilar edi. Jang yakunida hakamlar qarori bilan irlandiyalik Konor Makgregor g'alaba qozongan bo'lsa-da, o'sha kechadan keyin ikki sportchining faoliyati mutlaqo boshqa yo'ldan ketdi.

Konor ikki vaznda chempionlikni qo'lga kiritib, UFC tarixidagi eng katta yulduzga aylandi. Xollouey esa yarim engil vaznning eng faol va eng texnik jangchilaridan biri sifatida o'zini namoyon qildi.

Makgregor uchun faoliyatini qutqarib qoluvchi jang

Konor Makgregor besh yillik tanaffusdan keyin oktagonga qaytayotgani bu jangga alohida qiziqish uyg'otadi. Uning so'nggi rasmiy jangi 2021 yilda Dastin Porega qarshi kechgan va og'ir oyoq jarohati bilan yakunlangan edi. SHundan keyin irlandiyalik atlet ko'plab rejalar tuzdi, uning Maykl CHendlerga qarshi jangi belgilandi. Ammo turli sabablarga ko'ra jangga chiqa olmadi. 

37 yoshli Makgregor uchun bu nafaqat qaytish, balki UFC elitasi safida hali ham raqobatbardosh ekanini isbotlash imkoniyati hisoblanadi.

Xolloueyning eng katta ustunligi — doimiy faollik

Maks Xollouey esa butunlay boshqa vaziyatda oktagonga chiqadi. U oxirgi yillarda muntazam janglar o'tkazib keldi, yuqori darajadagi raqiblarga qarshi tajriba orttirdi va raqobat muhitini tark etmadi.

Besh yillik tanaffusdan keyin qaytgan raqibga qarshi bu juda katta afzallik hisoblanadi. Zamonaviy MMA'da yuqori surat, kardio va jang ritmi hal qiluvchi omillardan biri bo'lib qolmoqda.

Uslublar to'qnashuvi

Texnik jihatdan qaralsa, bu jangning eng qiziq qismi ham shunda.

Konor Makgregor:

• chap qo'l orqali kuchli zarbalar;

• qarshi hujumlarda yuqori samaradorlik;

• birinchi ikki raundda xavfli bosim.

Maks Xollouey esa:

• yuqori temp;

• ketma-ket zarbalarning ko'pligi;

• besh raundlik janglarda ustunlik;

• jismoniy tayyorgarlikning yuqori darajasi.

Agar Makgregor birinchi ikki raundda Maksni nokautga uchrata olmasa, jangning keyingi qismi Xollouey foydasiga og'ishi ehtimoli yuqori.

Ruhiy jihat ham hal qiluvchi bo'ladi

Matbuot anjumanlarida ikki sportchi o'rtasida keskinlik yana qaytdi. Makgregorning Xollouey ko'zoynagini yulib olishi UFC muxlislari orasida katta muhokamalarga sabab bo'ldi. Bu voqea jangga bo'lgan qiziqishni biroz bo'lsa ham oshirdi.

Biroq oktagon eshigi yopilganidan keyin barcha psixologik o'yinlar o'z ahamiyatini yo'qotadi. U erda faqat tayyorgarlik va mahorat hal qiluvchi omil bo'ladi.

Kim favorit?

Bukmekerlar va ko'plab tahlilchilarning fikriga ko'ra, aynan Maks Xollouey jangda favorit sifatida baholanmoqda. Buning asosiy sabablari:

• muntazam jang amaliyoti;

• yosh ustunligi;

• yuqori kardio;

• besh yillik tanaffusdan keyin qaytayotgan Makgregorning haqiqiy formasi nomalumligi.

SHu bilan birga, Konor Makgregorning zarba kuchi va katta janglardagi tajribasi uni har qanday vaqtda jang taqdirini o'zgartirishi mumkin bo'lgan sportchiga aylantirishi ham bor gap.

Xulosa

Makgregor – Xollouey revanshi chempionlik kamari uchun bo'lmasa ham, 2026 yilning eng muhim va eng ko'p muhokama qilinayotgan janglaridan biri hisoblanadi. Bu bahs Konorning faoliyatida yangi sahifa ochishi yoki uning buyuk davri ortda qolganini tasdiqlashi mumkin. Xollouey uchun esa bu 13 yil avvalgi mag'lubiyat uchun munosib revansh olish imkoniyatidir.

SHuning uchun UFC 329 nafaqat ikki sportchi, balki butun aralash yakkakurash muxlislari uchun katta tarixiy voqeaga aylanishi kutilmoqda.