4th President Cup Masters 2025 turnirida chempion bir tur oldin malum bo'ldi

Musobaqada dunyoning turli mamlakatlaridan kelgan grossmeysterlar bosh sovrin uchun bahs olib borishyapti. Hindistonlik Nihal Sarin (2701) turnirda birinchi raqam ostida saralangan bo'lib, aynan u musobaqa yakunlanishiga bir tur qolganda chempionlikni rasmiylashtirdi. Nihal kecha o'tkazilgan 8-turda qora donalarda o'ynaganiga qaramay, asosiy raqibi SHamsiddin Vohidovni mag'lubiyatga uchratdi va muddatidan oldin 4th President Cup Masters 2025 chempioniga aylandi. 

Tajriba o'z so'zini aytdi deymizu, lekin o'z qo'limiz bilan bosh sovrinni hindistonlik shaxmatchiga topshirdik. Nihalni 6-turda mag'lub etib, katta shov-shuv ko'targan Muhiddin Madaminov (2552) 8-turda oq donalarda o'ynashiga qaramay, franciyalik Maksim Lagarde (2608)ga yutqazib qo'ydi. Eronlik grossmeyster Danishvar Bardiya oq donalarda germaniyalik Frederik Sven (2653) bilan murosaga keldi. Yana bir grossmeysterimiz Abdimalik Abdisalimov (2561) FIDE bayrog'i ostida o'ynayotgan rossiyalik Aleksandr Grishuk (2654) bilan durangga rozi bo'ldi. 

SHu tariqa, bugun o'tkaziladigan so'nggi 9-tur oldidan hindistonlik Nihal Sarin to'rtinchi bor tashkil etilgan President Cup Masters 2025 chempioniga aylandi. Bugun chempion oq donalarda Abdimalik Abdisalimovga qarshi bahs olib boradi. Muhiddin Madaminov va SHamsiddin Vohidov 4,5 ochko bilan ikkinchi hamda uchinchi o'rinlarni band etgan. Bugun 9-turda Muhiddin ukrainalik Yuriy Kuzubovga, SHamsiddin esa Frederik Svenga qarshi dona suradi.