Abdusattorov Ruminiya turniridagi ikkinchi uchrashuvini o'tkazdi

O'z ichiga 5 ta turnirni jamlovchi ushbu nufuzli shaxmat musobaqasining umumiy mukofot jamg'armasi 1,5 million AQSH dollarini tashkil etadi. Mazkur musobaqada hamyurtimiz Nodirbek Abdusattorov (2766) ham o'z mahoratini namoyish etmoqda. Birinchi turda oq donalarda hindistonlik Rameshbabu Praggnanandha (2747) bilan durangga imzo chekkan grossmeysterimiz 2-turda qora donalarda franciyalik Alireza Firuzdjaga imkoniyatni boy berib qo'ydi. 

Birinchi turda g'alabaga erishgan amerikalik Fabiano Karuana hamda hindistonlik Dommaraju Gukesh bu turda durang qayd etishdi. Karuana vatandoshi Uesli So, Gukesh esa FIDE bayrog'i ostida o'ynayotgan Yan Nepomnyashiy bilan murosaga keldi. Ikkinchi turda birgina g'alaba qayd etilib, u ham bo'lsa Abdusattorov partiyasida kuzatildi. 

Malumot uchun, "Superbet Chess Classic Romania" turnirining mukofot jamg'armasi 350 000 AQSH dollarini tashkil qiladi. CHempion grossmeyster 100 000 dollarni qo'lga kiritadi. Hozircha Nodirbekning ishlari yaxshi emas. U 0,5 ochko bilan oxiridan bitta oldinga o'rinni egallab turibdi. Lekin bitta g'alaba vaziyatni butunlay o'zgartirib yuboradi. Turnir jadvalida 1,5 tadan ochkoga ega Karuana va Gukesh peshqadamlik qilyapti. 

Turnir ishtirokchilari: Fabiano Karuana (AQSH, 2805), Yan Nepomnyashhiy (FIDE, 2770), Nodirbek Abdusattorov  (O'zbekiston, 2766), Dommaraju Gukesh (Hindiston, 2763), Uesli So (AQSH, 2757), Rameshbabu Pragnanandxa (Hindiston, 2747), Anish Giri (Niderlandiya, 2745), Alireza Firuzdja (Franciya, 2737), Maksim Vashe-Lagrav (Franciya, 2732), Bogdan-Danel Dyak (Ruminiya, 2680).

2-tur natijalari: Firuzdja – Abdusattorov 1-0, Karuana – So, Nepomnyaiiy – Gukesh, Pragnanandxa – Vashe-Lagrav, Dyak – Giri partiyalarida durang qayd etildi.