Abu Dhabi Chess Festival 2024. Bugun so'nggi tur, ikki shaxmatchimiz peshqadam!

Mukofot jamg'armasi 63 600 AQSH dollarini tashkil etuvchi Abu Dhabi Chess Festival 2024 turnirining "Masters" guruhida 11 nafar shaxmatchimiz ham o'z imkoniyatini sinovdan o'tkazyapti. Kecha o'tkazilgan 8-turdan so'ng musobaqa jadvalida yosh grossmeysterlarimiz Nodirbek Yakubboev (2665) va SHamsiddin Vohidov (2643) 6,5 ochko bilan qo'shhokimlikni yuzaga keltirishdi. 

Ularning har ikkisi ham hali turnirda mag'lubiyatga uchramagan. Nodirbek Yakubboev oq donalarda braziliyalik Luis Paolo Supi (2571)ni mag'lubiyatga uchratdi. Vohidov esa ketma-ket beshta g'alabadan keyin ochko yo'qotdi. SHamsiddin oq donalarda hindistonlik Raunak Sadhvani (2653) bilan durang o'ynadi. 

Bu turda Javohir Sindarov (2674) muhim g'alabani qo'lga kiritdi. U hindistonlik Adhiban (2532)ni taslim etib, ochkolarini 6 taga etkazib oldi. Sindarovda ham oz bo'lsa-da, chempionlik uchun imkoniyat saqlanib qoldi. Bahrom Baxrillaev (2344) oq donalarda Jimmi Jubin (Hindiston, 2441)dan ustun keldi.  

Sakkizinchi turda qolgan shaxmatchilarimizdan Abdumalik Abdusalimov va Humoyun Begmuratov raqiblariga imkoniyatni boy berishdi. Ortiq Nig'matov, Muhammadzohid Suyarov, Saidakbar Sayidaliev va Afruza Hamdamova bu safar ham durang natija qayd etishdi. 

Bugun o'tkaziladigan so'nggi 9-turda SHamsiddin Vohidov o'zi singari 6,5 ochko jamg'argan David Paravyan (FIDE, 2600)ga qarshi oq donalarda o'ynaydi. Qo'shimcha ko'rsatkichlarga ko'ra 1-o'rinni egallab turgan Nodirbek Yakubboev qora donalarda Leon Mendonsa (Hindiston, 2621) bilan hisob-kitob qiladi. CHempionlik Nodirbekning o'z qo'lida. Agar Yakubboev ochko yo'qotib, aksincha SHamsiddin g'alaba qozonsa, aynan u bosh sovrinni qo'lga kiritadi.