Abu Dhabi Chess Festival 2024. Qatorasiga beshinchi g'alabasini qo'lga kiritgan SHamsiddin yakka peshqadamga aylanib oldi!

Mukofot jamg'armasi 63 600 AQSH dollarini tashkil etuvchi Abu Dhabi Chess Festival 2024 turnirining "Masters" guruhida 11 nafar shaxmatchimiz ham o'z imkoniyatini sinovdan o'tkazyapti. Ortda qolgan 7-turdan so'ng musobaqa jadvalida yosh grossmeysterimiz SHamsiddin Vohidov (2643) 6 ochko bilan yakka peshqadam bo'lib oldi. U 7-turda qora donalarda o'ynashiga qaramay, hindistonlik Pranav (2598)ni mag'lubiyatga uchratdi. 

Hali mag'lubiyatga uchramagan yana bir grossmeysterimiz Nodirbek Yakubboev (2655) bu turda qora donalarda harakat qilib, FIDE bayrog'i ostida o'ynayotgan David Paravyan (2600) bilan durangga imzo chekdi. Javohir Sindarov (2674) esa oq donalarda Luke Leon Mendonsa (Hindiston, 2621) bilan murosaga ko'chasini tanladi. 

Ettinchi turda shaxmatchilarimizdan Abdumalik Abdusalimov, Ortiq Nig'matov va Bahrom Baxrillaev raqiblarini mag'lub etishdi. Muhammadzohid Suyarov, Saidakbar Sayidaliev va Afruza Hamdamova bu safar ham durang natija qayd etishdi. 

Bugun o'tkaziladigan 8-tur oldidan SHamsiddin Vohidov 6 ochko bilan yakka peshqadamga aylanib olgan bo'lsa, Nodirbek Yakubboev 5,5 ochko bilan qo'shimcha ko'rsatkichlarga ko'ra ikkinchi o'rinni egallab turibdi. Javohir Sindarov, Abdumalik Abdusalimov va Ortiq Nig'matov hisobida 5 tadan ochko bor.