Afruza Hamdamova rapid yo'nalishida qizlarimiz orasidagi eng yaxshi natija muallifi bo'ldi (To'liq natijalar)

SHaxmat mundialidagi rapid yo'nalishida ayollar o'rtasidagi bellashuvlar yakunlandi.

Uch kun davomida shaxmatchilar 11 ta partiyada ishtirok etdi. Yakunda Xalqaro neytral sportchi Anastasiya Bodnaruk 8,5 ochko bilan chempion bo'ldi.Kuchli uchlikdan Hindiston vakilasi Humpi Koneru hamda xitoylik Ley Tingji joy oldi.

Bahslarda O'zbekiston terma jamoasining 13 nafar azosi ham ishtirok etdi.

Yakunda hamyurtlarimiz orasidagi eng yaxshi natija Afruza Hamdamovaga tegishli bo'ldi. U 11 ta imkoniyatdan 6,5 ochko jamg'irishga muvaffaq bo'ldi. Yosh hamyurtimiz bu natijasi orqali Jahon chempionatini 34-o'rinda yakunladi.

Umida Omonova esa 11 ta urinishdan 5,5 ochko ishladi va 57-pog'onadan joy oldi.

Sarvinoz Qurbonboeva hamda Nodira Nodirjonova 4,5 ochko to'plagan bo'lsa, Guldona Karimova, Nilufar Yakubboeva hamda Maftuna Bobomurodova 4 ochko ishlashga muvaffaq bo'ldi.

SHuningdek, Marjona Malikova, Yulduz Hamroqulova hamda Zilola Aktamova 11 ta imkoniyatda 3,5 ochko ishladi. Hulkar Tohirjonova va SHahnoza Hamroqulova esa Jahon chempionatini 3 ochko bilan yakunladi.