Afruza Hamdamovada yana g'alaba, uni jahon chempionligidan yarim ochko ajratib turibdi

Dunyo birinchiligining 16 yoshgacha bo'lgan qizlar musobaqasida Afruza Hamdamova muvaffaqiyatli odimlamoqda. Hamyurtimiz 9-turda FIDE bayrog'i ostida o'ynayotgan Yana Japovani oq donalarda mag'lubiyatga uchratib, o'z ochkolarini 8,5 taga etkazib oldi. 

Hamdamova 9 ta uchrashuvdan faqat bittasida durang o'ynab, qolgan barcha partiyalarda zafar quchdi. Oldinda yana ikkita tur bor. Afruzaning eng yaqin taqibchisi yana bir FIDE bayrog'i ostidagi Leyla Tabermakova 7 ochkoga ega bo'lib turibdi. SHaxmatchimiz 8-turda qora donalarda o'ynashiga qaramay, Tabermakovani taslim etgandi. Bugun vatandoshimiz 10-turda hindistonlik Mrittika Malikka qarshi qora donalarda o'ynaydi va durang ham uni jahon chempioniga aylantiradi. Afruza Hamdamova o'tgan yili Italiyada 14 yoshgacha shaxmatchilar o'rtasida ham jahon chempioni bo'lgan edi. 

Braziliyalidagi jahon chempionatining 14 yoshgacha o'g'il bolalar musobaqasida qatnashayotgan Javohir Bozorov 6 ochko bilan qo'shimcha ko'rsatkichlarga ko'ra 20-o'rinni egallab turibdi. U 9-turda AQSH vakili Velant Talvalkardan ustun keldi. Bugun u 10-turda qora donalar FIDE bayrog'i ostida o'ynayotgan Aleksey Proxorovga qarshi bahs olib boradi. Bu yosh toifasida qozog'istonlik Edgar Mamedov 7,5 ochko bilan yakka peshqadam bo'lib turibdi.   

Quvonarlisi, 14 yoshgacha qizlar musobaqasida muvaffaqiyatli tarzda ishtirok etayotgan Nilufarxon Imomqo'zieva jahon chempionati medallaridan birini qo'lga kiritishga juda yaqin turibdi. SHaxmatchimiz 9-turda qora donalarda o'ynashiga qaramay, franciyalik Emili Negreni mag'lub etdi. Nilufar 7 ochko bilan qo'shimcha ko'rsatkichlarga ko'ra 2-o'rinni band etgan. Peshqadam Diana Hafizova (FIDE) hisobida 8 ochko bor. Hamyurtimiz 8-turda aynan Dianaga yutqazib qo'ygandi. Bugun Imomqo'zieva 10-turda qora donalarda Oksana Goryachkina (FIDE)ga qarshi bahs olib boradi.