Ahad Yusupov: “Afg'onistonni mag'lub etishimizga ishonaman”

Biz hozircha terma jamoamizning so'nggi o'yini bo'lib turgan – BAAga qarshi kechgan uchrashuvdan so'ng bosh murabbiy Ahad Yusupovning fikrlari bilan qiziqdik.

- Ahad aka, Osiyo o'yinlariga tayyorgarlikdan ko'nglingiz to'lmadi, shundaymi?

- SHunday deyish ham mumkin. Tayyorgarlik Toshkentda bo'lib o'tdi. Osiyo o'yinlariga jo'nab ketish oldidan bir hafta mobaynida poytaxtimizda o'quv-mashg'ulot yig'inini o'tkazdik. Tarkibda o'zgarishlar ro'y berdi. Asosan tajribali futzalchilarga suyandik. Jahon chempionatiga bormagan Jamoliddin SHaripov, Andrey SHlema singari tajribali futzalchilardan umidimiz katta edi. Ayniqsa, to'purar futzalchimiz ilk o'yindayoq ishonchni oqladi. Jamoliddinning ikkita goli terma jamoamizga as qotdi. Keyin tajribali futbolchi Zayniddin Tojievni ham safimizga qo'shib oldik. U ham jamoamizning g'alabasiga o'z ulushini qo'shdi, deb ayta olaman.

- Bevosita o'yin haqida qanday fikrdasiz? Jamoaviy o'yin pand bermadimi? 

- SHu narsani cho'chigandim. Lekin yigitlar bir jamoa bo'lib harakat qilishdi. O'yin mobaynida 3:1 hisobida oldinga chiqib olgandik. Lekin so'nggi daqiqalarda o'tkazib yuborgan gollar sabab asosiy vaqtda durang natija qayd etildi. Ekstra taymlarda ham vaziyat o'zgarmadi. Penaltilar seriyasida SHlema va Faxrutdinov o'zlarini ko'rsatishdi. O'z o'rnida darvozabonimiz Akmal Xazratqulov ham raqib futbolchilarining ikkita zarbasini qaytarishga muvaffaq bo'ldi. SHu tariqa, guruh g'olibi sifatida chorak finalga chiqdik. Yarim final chiptasi yo'lidagi raqibimiz Afg'oniston terma jamoasi bo'ladi. Bu jamoaning Xitoyga qarshi o'yinini ko'rdim. O'ylaymanki, payshanba kuni bo'lib o'tadigan uchrashuvda g'alaba biz tomonda bo'ladi.

- Ob-havo qanday?

- Issiq va namgarchilik yuqori. O'yin paytlari nafas olish qiyin. Lekin futbolchilarimiz mahalliy iqlim sharoitiga moslashib olishdi.

- Tashkilotchilik qay darajada?

- Osiyo o'yinlari bo'lgani uchun, tashkilotchilik borasida hech qanday muammo yo'q. Barcha sharoitlar yaratilgan. 

- Terma jamoamiz oldiga aniq maqsad qo'yilganmi?

- Sovrinli o'rinlardan birini qo'lga kiritishimiz kerak. Bundan ikki yil avval Tailandning Pxuket shahrida o'tkazilgan Osiyo o'yinlarida beshinchi o'rin bilan kifoyalangandik. Bu safar natijani yaxshilashga harakat qilamiz.

    Kamoliddin ALIMOV suhbatlashdi