"Al-Beruniy" xalqaro turnirida 2-tur uchrashuvlari o'tkazildi (barcha natijalar)

Umumiy mukofot jamg'armasi 68 700 AQSH dollarini tashkil qiluvchi musobaqa uch guruhda o'tkazilmoqda. "Masters" guruhida hamyurtlarimizdan eng yaxshi natijaga hozircha yosh grossmeysterimiz Abdumalik Abdusalimov erishmoqda. U bir g'alaba va bir mag'lubiyat bilan 1 ochko jamg'argan holda 10 ishtirokchi orasida 7-o'rinni egallab turibdi. Abdusalimov 2-turda qora donalarda vengriyalik Sanan Syugirovga imkoniyatni boy berdi. Ortiq Nig'matov armanistonlik Hayk Martirosyandan engildi. Muhiddin Madaminov xitoylik Ma Kyun bilan murosaga keldi. Afruza Hamdamova rossiyalik Vladislav Artemev bilan durang o'ynadi. Rapid bo'yicha amaldagi jahon chempioni rossiyalik Volodar Murzin armanistonlik SHant Sargsyanga yutqazib qo'ydi.

"CHellenjer" guruhida qatnashayotgan shaxmatchilarimizdan bu turda ham hech kim g'alaba qozona olmadi. Saidakbar Saydaliev rossiyalik Ivan Zemlyanskiy bilan, Almas Rahmatullaev qozog'istonlik Rinat Jumabaev bilan durang qayd etdi. Humoyun Begmuratov oq donalarda Devid Paranyanga Muhammadzohid Suyarov Arseniy Nesterovga yutqazib qo'ydi. 

"Fyuchers" guruhida reytingi 2400 va undan yuqori 6 nafar xorijlik shaxmatchi qatnashyapti. Umida Omonova ushbu guruhning birinchi raqamli ishtirokchisi rossiyalik Klementi Sichev (2542) bilan durangga erishgandi. Bu safar u qora donalarda o'ynashiga qaramay, ukrainalik grossmeyster Vitaliy Bernardskiy bilan murosaga keldi. Asrorbek Omonov turkmanistonlik Saparmirat Atabaev bilan durang qayd etdi. Nilufar Yakubbaeva va Guldona Karimova bu turda mag'lubtiyat alamini totib ko'rishdi.