"Al-Beruniy" xalqaro turnirining birinchi turida qanday natijalar qayd etildi?

Umumiy mukofot jamg'armasi 68 700 AQSH dollarini tashkil qiluvchi musobaqa uch guruhda o'tkazilmoqda. "Masters" guruhida hamyurtlarimiz bilan birga reytingi 2600 va undan yuqori bo'lgan 6 nafar xorijlik shaxmatchi ham bosh sovrin uchun bahslarga kirishdi. Grossmeysterimiz Abdumalik Abdusalimov o'ziga xos o'zbek derbisida Ortiq Nig'matovni mag'lubiyatga uchratdi. 

Muhiddin Madaminov armanistonlik SHant Sargsyanga, Afruza Hamdamova yana bir arman grossmeysteri Haik Martirosyanga imkoniyatni boy berdi. Rapid bo'yicha amaldagi jahon chempioni rossiyalik Volodar Murzin vengriyalik Sanan Syugirovdan ustun keldi. Rossiyalik Vladislav Artemev va xitoylik Ma Kyun bahsida durang natija qayd etildi.      

"CHellenjer" guruhida qatnashayotgan shaxmatchilarimizdan hech biri 1-turda g'alaba qozona olmadi. Birgina Humoyun Begmuratov qora donalarda qozog'istonlik grossmeyster Rinat Jumabaev bilan murosaga keldi. Almas Rahmatullaev eronlik Bardiya Daneshvarga, Muhammadzohid Suyarov Ivan Zemlyanskiyga, Saidakbar Saydaliev Devid Paranyanga yutqazib qo'ydi.  

"Fyuchers" guruhida reytingi 2400 va undan yuqori 6 nafar xorijlik shaxmatchi qatnashyapti. Umida Omonova ushbu guruhning birinchi raqamli ishtirokchisi rossiyalik Klementi Sichev (2542) bilan durangga erisha oldi. O'zbek derbisida Asrorbek Omonov ayollar o'rtasida grossmeyster Nilufar Yakubbaevadan ustun keldi. Guldona Karimova esa qora donalarda shveciyalik grossmeyster Vitaliy Sivukdan engildi.