Aleksandr Geynrix: “G'alabani og'ir damni o'tkazayotgan vatandoshlarimizga bag'ishlaymiz”

“Qatarning qanday kuchga ega ekanligini yaxshi bilardik. Bu terma jamoa bilan ko'p yillardan beri to'qnash kelamiz. SHuning uchun ularga qarshi extiyotkor harakat qilishimiz talab etilardi. Qolaversa, guruhimizning qolgan ikkita o'yinida Janubiy Koreya hamda Eron terma jamoalari ochko yo'qotishdi. Bu biz uchun yaxshigina imkoniyat edi. Toshkentda bo'lib o'tgan o'yindan keyin ko'pchilik Suriyani qiyinchilik bilan mag'lubiyatga uchratganimizni aytib, tanqid qildi. Bugun suriyaliklar JCHning doimiy ishtirokchilaridan bo'lgan Koreyadan ochko olishdi. Bu guruhimizda kuchsiz terma jamoaning yo'qligini ko'rsatmoqda.

Bu g'alaba O'zbekiston uchun juda ham kerak edi. Biz ham qiyin damlarni o'tkazdik. So'nggi kunlarning qanday o'tganini o'zimiz bilamiz. SHuning uchun ham bugun yutmasak bo'lmasdi. Bu esa oson bo'lmadi. Jamoadoshlarimning kayfiyati tushkun holatda edi. SHunday bo'lsada, biz iroda ko'rsata oldik. Oz bo'lsada, yurtdoshlarimizning ko'ngillarini ola bilgan bo'lsak, bundan biz futbolchilar xursandmiz”, - dedi Aleksandr Geynrix.

- Negadir O'zbekiston terma jamoasi ikki xil o'yin ko'rsatayapti. Suriyaga qarshi ham, bugun ham ikkinchi bo'limning birinchisidan farqi katta bo'ldi. Nima uchun birinchi bo'limda ham shunday o'ynay olmayapmiz?

- Suriya yopiq jamoa edi. Qatar esa o'z maydonida o'ynagani uchun birinchi bo'limda faollik qildi. Biz o'z paytimizni kutishga majbur bo'ldik. Ikkinchi bo'limga kelib, ular charchab qoldilar va biz uchun oldinga chiqishga fursat kelgandi.