Alonso "Aston Martin" bilan 1+1+1 ko'rinishida shartnoma imzoladi

Ispaniyaning AS nashri o'z manbalariga tayanib, tomonlar o'rtasidagi muzokaralar qanday kechganligi haqida malumot berdi. 

Malum qilinishicha, Alonso "Aston Martin" bilan 1+1+1 sxemasi bo'yicha uch yillik shartnoma imzolagan. SHartnomada har mavsumdan keyin uzaytirish va muddatidan oldin tugatish variantlari ko'zda tutilgan. Bu variantlardan faqat Alonso foydalanishi mumkin. Ispaniyalik poygachining "Aston Martin"dagi maoshi esa bir mavsum uchun 20 million dollarni tashkil qiladi.

Dastlab "Aston Martin" Sebastyan Fettel bilan shartnomani uzaytirmoqchi edi. Poygachiga yana bir yillik yangi shartnoma taklif qilingandi. Biroq, Fettel otasi, rafiqasi va farzandlari bilan bu mavzuni muhokama qilib, "Formula-1"dan ketishga qaror qildi va bu qarorini ommaga elon qildi.

Natijada, Vengriyadagi Gran-prining dam olish kunlarida Alonso va "Aston Martin" o'rtasida faol muzokaralar bo'lib o'tdi va tezda kelishuvga erishildi.

Qayd etilishicha, "Alpin" jamoasi Alonsoga ikki yillik shartnoma taklif qilgan va bu shartnoma shartlari allaqachon ikki tomon tomonidan ozmi-ko'pmi kelishib olingan. Biroq yakunda Alonso "Aston Martin"ning taklifini qabul qildi.